![Елордада жедел-жәрдем шақыру азайды](/media/2020/08/18/foto-k-state.jpg)
Қабылданған карантин шараларының нәтижесінде инфекцияның таралу тізбегін үзіп, медицина ұйымдары мен қызметкерлер жүктемесін едәуір азайтуға қол жеткізілді.
«Қазіргі уақытта стационарларда 343 адам бар. Аурудың шарықтау шегінде 4 мыңға жуық адам болды. Алты аптаға созылған карантин арқылы коронавирустың таралуына байланысты жағдай реттелді. Мемлекет қабылдаған шаралар дәрігерлерге өз жұмыстарымен тікелей айналысуға – адам өмірін сақтауға мүмкіндік берді. Медицина қызметкерлері әрбір науқасқа тиісті көңіл бөлді. Біз төмендеу динамикасын жалғастырып қана қоймай, карантин нәтижелерін де бекітуіміз керек.
Инфекция таралмауы үшін ауқымды шаралар қажет. Бұл қатаң санитарлық-эпидемиялық нормаларды сақтау арқылы ғана мүмкін болмақ. Карантинді жеңілдету вирус түбегейлі жойылды дегенді білдірмейді. Оның қаупі әлі де бар. Туыстарыңызды қорғау үшін қатаң санитарлық нормаларды ұстанып, қонаққа адам көп жиналатын орындарға барудан бас тарту қажет», деді елорда әкімі Алтай Көлгінов.
16 стационардың алтауы жабылды – ондағы барлық науқас емделіп шықты. Стационарлардың жүктемесі 99%-дан 17,2%-ға дейін төмендеді. Барлық қалалық емханалар алдын ала жазылу бойынша жоспарлы қабылдауды қайта бастады. КВИ белгілері бар науқастарды қабылдау бойынша фильтр-кабинеттердің жұмысы жалғасуда.
Әкімдік медицина мекемелеріне 600-ден астам флоуметр, 500 оттегі концентраторы, 500 арнайы кереует, өкпені жасанды желдету және компьютерлік томография аппараттарын жеткізді. Медицина жабдықтары мен дәрі-дәрмек сатып алу бойынша жұмыстар тұрақты негізде жүргізілуде.