Кеше Қазақстан Республикасы Парламенті Сенатының Төрағасы Қасым-Жомарт Тоқаев БҰҰ Бас хатшысының орынбасары, БҰҰ-ның Женевадағы бөлімінің Бас директоры лауазымындағы қызметінің аяқталуына байланысты Бернде Швейцария басшылығымен бірқатар кездесулер өткізді, деп хабарлады Қазақстан Республикасы Парламенті Сенатының баспасөз қызметі.
Кеше Қазақстан Республикасы Парламенті Сенатының Төрағасы Қасым-Жомарт Тоқаев БҰҰ Бас хатшысының орынбасары, БҰҰ-ның Женевадағы бөлімінің Бас директоры лауазымындағы қызметінің аяқталуына байланысты Бернде Швейцария басшылығымен бірқатар кездесулер өткізді, деп хабарлады Қазақстан Республикасы Парламенті Сенатының баспасөз қызметі.
Швейцария Конфедерациясының Вице-президенті, Федералдық Сыртқы істер кеңесшісі (министрі) Дидье Буркхальтер БҰҰ-ның Женевадағы бөлімінің бастығы лауазымындағы Қасым-Жомарт Тоқаевтың жұмысының нәтижесін жоғары бағалап, оның жаһандық халықаралық орталық ретінде Женеваның нығаюына едәуір үлес қосқанын айрықша атап өтті.
Қ.Тоқаев Швейцария үкіметіне БҰҰ құрылымдарына ұдайы жәрдемі үшін алғысын айтты. Жыл сайын БҰҰ жүйесінің ондаған құрылымдары мен конференциялары үшін «баспана» ретіндегі ғана емес, күрделі мәселелер мен қақтығыстарды реттеу жөніндегі негізгі алаң ретіндегі Женеваның жаһандық рөлі арта түсуде.
Әңгіме барысында Астана мен Берннің халықаралық аренадағы ынтымақтастығы, әсіресе, Швейцарияның 2014 жылғы ЕҚЫҰ-ға төрағалық етуі және 2017-2018 жылдарда Қазақстанның БҰҰ Қауіпсіздік Кеңесіне тұрақты емес мүшесі болуына үміткерлігін ілгерілету тұрғысындағы мәселелер қаралды.
Қазақстан Парламенті Сенаты Төрағасының Швейцария Кантондары кеңесінің Президенті Филиппо Ломбардимен кездесуінде парламентаралық байланыстардың келешегі талқыланды. Онда ЕҚЫҰ және Еуропа Кеңесі Парламенттік ассамблеялары аясындағы өзара іс-қимыл, сондай-ақ заңнама әзірлеу саласында тәжірибе алмасу туралы әңгіме болды. Қ.Тоқаев қазақстандық парламентарийзмнің қазіргі замандағы даму кезеңдері, саяси партиялардың қызметі, Мемлекет басшысы Нұрсұлтан Назарбаевтың тиімді парламенттік және қоғамдық бақылауды қамтамасыз ету жөніндегі бастамалары туралы әңгімеледі.
Қ.Тоқаев Қазақстанның «жасыл экономиканы» дамыту, балама энергетика, ауыл шаруашылығы және көлік саласында Швейцариямен әріптестікті мақсат етіп отырғанын атап өтті. Астанадағы ЭКСПО-2017 халықаралық көрмесі осындай әріптестік үшін тамаша мүмкіндіктер береді.
Сенат Төрағасы швейцариялық әріптесін Астанаға сапармен келуге шақырды. Ф.Ломбарди шақыруды алғыспен қабыл алып, Қазақстанға үстіміздегі жылдың қарашасында келуге әзірлігін хабарлады.
