Демалыңыз, ем алыңыз...

Нұр-Сұлтан қаласының тұрғындары жыл сайын демалып, денсаулықтарын қалпына келтіру үшін жазды асыға күте­ді. Жаһан жұртын әбігерге салған ін­деттің әлі басылар түрі жоқ. Соған қара­мастан елорда тұрғындары денсау­лықтарына жіті мән беріп, иммундық белсенділікті арттыру үшін арнайы шипажай немесе демалыс кешендеріне баруды жалғастыруда.

Қала маңындағы ірі демалыс орындарына Balqaragai, Green Park, Золотой фазан, Айша сынды кешендер кіреді. Мәселен, Balqaragai демалыс айма­ғында сыйымдылығы 30 адамға дейін жайлы бөренелі коттеджде орналаса аласыз. Демалыс кешені елорданың ақ қайыңды жасыл белдеуінде, қолдан жасалған орманда орналасқан.

Ал Қосшы кентінде, Нұра өзенінің бойында орналасқан қала сыртындағы Green Park аумағында жазғы күркелер, киіз үйлер, ипподром және тіпті шағын хайуанаттар бағы да бар. Солардың ішінде «Золотой фазан» туралы ауыз толтырып айту үшін аталған кешеннің бас­шысы Дархан Серікбайұлымен тілдескен едік.

–  Біз демалыс орнымызды отбасылық көңіл көтеру аумағы ретінде дамыта отырып, аумақ көлемін барынша үлкейтуге тырыстық. Асфальтті және орманды, далалы соқпақ жолдармен серуендеуді ұсына аламыз. Демалыс аймағы 800-ден астам гектарды қамтиды. Бұл – оқшау­лануға өте жақсы орын. Сондай-ақ қонақ­тарымыздың 100 метрге дейін арақа­шықтық сақтауын қамтамасыз етеміз. Демалуға арналған көптеген жеке алаң, жазғы мейрамхана, күрке (беседка), балық аулауға арналған пирс, терраса, көлдің қасында орналасқан коттедж немесе күмбезді үйшіктер мен киіз үйлер бар. Қылқан жапырақты орманда серуендеуге арналған соқпақтар да бар, – дейді Д.Серікбайұлы.

Сондай-ақ «Золотой фазан» кешені күншығыс елінің орман терапиясын тиімді емдеу әдістеріне алмастырып отыр. Мәселен, табиғи терапия әдісі. Бұл – өнеркәсіптік қаланың шуынан алыстатып, эмоциялық жайлылық беретін, табиғи дыбыстарға бағытталған. Келесі ғылыми туризм әдісі – көлдерде ұя са­латын құстардың (жабайы қаздар, тырналар, аққулар, үйректер мен ондатрлар және т.б.) өмірін зерттеуге ар­­налған табиғаттағы жұмыс. Осы ар­қылы ата-аналар балаларына орманда серуен­деу кезінде тұрмыстық өмір сүру жағдайларын үйретеді.

Аталған демалыс орны айтулы іс-ша­ралар өткізетін алаң ретінде қызмет көрсетеді. Солардың қатарында, бұған дейін қа­ла әкімдігінің «Жастар саясаты» бөлімінің бастамасымен елорда жастарына арналған коуч-тренингтер ұйымдастыратын.

– Жыл сайын Ақмола облысынан балаларды жазғы лагерьге алып барамыз. Облыстық әкімдік пен «Howard Roark» серіктестігімен бірлесе отырып, жаз­ғы балалар лагерін ұйымдастырамыз. Бірін­­­ші карантин мерзімі аяқталғаннан кейін науқас балаларға көмек көрсету, қайы­рымдылық сапарлары мен жануарлармен таныстыру үрдісін қолға алдық, – дейді «Золотой фазан» ЖШС басшысы.

Бұдан бөлек, келушілерді қабыл­дайтын барлық объектілерде санитар­лық-эпидемиялық нормалар негізіндегі талаптар қадағаланып отырады. Қонақ­­­тарға қатаң түрде бетперделер, анти­сеп­тиктерді қолдану міндеттелген. Дема­лыс орнында жиі залалсыздандыру жұ­мыстары жүргізіледі.