Біріншіден, компьютерге мұқтаждық мұғалімдерде де, оқушыларда да бар. Мәселен, жас ұрпақты білім нәрімен сусындатуға білігін арнайтын мұғалімдердің 355-іне компьютер ауадай қажет. Сол себептен оларға мектеп компьютерлерін беру көзделіпті. Ұстаздардың мектепке келіп, жұмыс істеуіне де жағдай жасалады. Сондай-ақ 16 693 оқушыға компьютер қажет.
– Біздің басты міндетіміз – оқушылардың сапалы білім алуына барынша қолайлы жағдай жасау. Сондықтан бірінші кезекте көпбалалы және әлеуметтік тұрмысы төмен отбасылар есепке алынып отыр, – дейді облыс әкімі Махамбет Досмұхамбетов. – Жаңа оқу жылы басталғанға дейін оқушыларға мектептердегі 15 246 компьютер қайтарымды келісіммен таратылып беріледі.
Әкімнің айтуына қарағанда, көктемде оқушыларды қашықтан оқытуға 1 400 компьютер сатып алыныпты. Енді жергілікті бюджеттен қазіргі дәуірдің озық технологиясының бірі – 1 611 ноутбукты сатып алу үшін 282 млн теңге бөлінген. Сондай-ақ мектептерді жан басына қаржыландыру мақсатында республикалық бюджеттен қарастырылған қаржының 250 млн теңгесіне 1 389 ноутбук сатып алу жоспарланыпты. Жалпы, жыл соңына дейін 18 510 компьютер сатып алынбақ.
Екіншіден, интернеттің қолжетімдігіне сараптама жүргізілді. Өңірдегі 3 мың оқушыға интернет желісі қажеттігі айқындалды. Аудандарда интернет игілігін пайдалана алмай отырған отбасылар бар. Мәселен, Қызылқоғада – 194, Исатайда – 187, Мақатта – 298, Махамбетте – 433, Индер ауданында 295 отбасын интернет желісіне қосуды «Қазақтелеком» АҚ-ның өңірлік филиалы қолға алды. Бұдан өзге мобильді байланыс операторларымен келіссөздер жүргізіліпті. Сөйтіп, жалпыға міндетті оқу қорынан қайтарымсыз негізде 3 мың роутер сатып алынады. Бірақ 47 мектепте интернеттің жылдамдығы төмен. Демек, бұл мәселе оң шешілмесе, қашықтан оқытудың қиындайтыны анық. Сол себептен, 31 мектепте интернеттің жылдамдығын көтеру үшін нақты шаралар қарастырылып жатыр.
Үшіншіден, отбасылардың бәрі бірдей балаларын қашықтан оқытуға мүмкіндігі болмауы мүмкін. Міне, сол себептен, әкесі де, шешесі де жұмыс істейтін отбасылардағы бастауыш сынып оқушылары үшін 170 мектепте
1 446 кезекші сынып ашу көзделді. Мұндай сыныпта оқитын оқушының ата-анасының екеуінен де анықтама талап етіледі. Қазір кезекші сыныпта оқитын 21 637 оқушының ата-анасынан өтініш түсті. Осыған орай кезекші сыныптар ашылатын мектептерде қауіпсіздік шаралары күшейтіліп, санитарлық жұмыстар жүргізілуде. Білім ордалары залалсыздандыру құралдарымен толық қамтылыпты.
Төртіншіден, өңір мектептерінде әлі де 472 педагог жетіспейді. Оның ішінде бастауыш сыныпқа 74 мұғалім қажет. Әрине бұл көп жылдан бері күрделенген мәселе болғандықтан, биыл толық шешімін табады деу қиын. Дегенмен биылғы жаңа оқу жылында 101 жас маман алғашқы еңбек жолын Атыраудың білім саласында бастауға ниет білдіріп отыр. Олардың арасында бастауыш сыныптың 20 мұғалімі бар. Сонымен бірге «Дипломмен – ауылға!» бағдарламасымен 20 жас маман аудандарға барады.
– Ұстаздардың алаңсыз жұмыс істеуі үшін әлеуметтік жағдайына баса мән береміз. Бұл – жалақы, тұрғын үй мәселесі. Жас мамандарды қолдау мақсатында 4,5 млн теңгеге дейін қаржы беріледі. Сонымен бірге биыл облыс әкімдігінен педагог мамандығына бөлінетін грант саны артып отыр, – дейді М.Досмұхамбетов.
Бесіншіден, оқушыларға қажеттінің бірі – жаңартылған, қайта басылған оқулық. Бұл мәселе де жіті назарда. Мектептерді оқулықпен қамтуға жергілікті қазынадан 1 млрд 257 млн теңге бөлінді. Еліміздегі 19 баспадан оқулықтар мен оқу-әдістемелік құралдарды сатып алу үшін 110 келісімшарт жасалды. Баспалардан оқулықтарды білім ұяларына тасымалдау үшін 14 млн теңге қаралды. Оқулықтар 10 тамыздан бері жеткізіліп жатыр.
Алтыншыдан, өңірде үш ауысыммен білім беретін 12 мектеп бар. Бұл мектептерде 23 992 оқушы дәріс алады. Әрине бұл мұғалімге де, оқушыға да оңай емес. Білім сапасына кері әсерін тигізетіні анық. «Сол себептен, аталған мәселені шешу үшін 3 мың орындық төрт мектептің құрылысы жүргізіліп жатыр. Сонымен бірге 1 800 орындық үш білім ордасын салу жоспарланып отыр. Биыл апатты жағдайдағы мектептің орнына біреуі пайдалануға беріледі. Осындай екі мектептің құрылысы 2022 жылы аяқталмақ. Бұған қоса тағы екі мектептің құрылысы жоспарлануда», деді облыс әкімі.
Жетіншіден, өңір тұрғындарының бәрі бірдей бақуатты емес. Тұрмысы осал отбасылар, сондай-ақ жетім және ерекше күтімді қажет ететін балалар кездеседі. Қазір қолдауға мұқтаж 11 187 оқушы бар. Оларды қатарынан қалыс қалдыруға бола ма? Сол үшін «Мектепке жол» акциясы арқылы көмек беру басталды. Бұл акция Atamekenim.kz порталы арқылы жүзеге асырылуда. Порталға әлеуметтік тұрмысы төмен топқа жататын отбасылардың балалары туралы мәліметтер енгізіліп, 9 607 оқушы анықталды. Сондай-ақ әлеуметтік жағдайы төмен, жетім, ерекше білімді қажет ететін 11 187 оқушының 3641-іне киім-кешек пен қаржылай қолдау көрсетілді. Қазан айына дейін 8 100 балаға көмек беру жоспарланып отыр.
Атырау облысы
