Қоғам • 25 Тамыз, 2020

Кавасакиге ұқсас синдром

52 рет көрсетілді

Қазір елімізде эпидемиялық ахуал тұрақталып, COVID-19 індетінің таралу ауқымы айтарлықтай азайды, ауырғандардың біразы жазылды. Алайда індеттен айыққан балалардан қабыну синдромының байқала бастағаны көпшілікті алаңдатып қойды. Осы жөнінде Орталық коммуникациялар қызметі алаңында жан-жақты мағлұмат берілді.

Денсаулық сақтау министрлігінің ресми өкілі Бағдат Қожахметов соңғы үш аптада елімізде коронавирус инфекциясы мен пневмония ауруы бойынша жағдайдың тұрақтанғанын атап өтті. Оның айтуынша, 3-9 тамыз аралығында 7108 адам коронавирус инфекциясын жұқтырып, 222 адам қайтыс болған. 7940 азамат пневмониямен ауырып, соның салдарынан 122 адам көз жұмған. Ал 10-16 тамыз аралығында КВИ ПТР (+) диагнозы 3995 адамда, КВИ ПТР (-) 5344 адамда анықталды. Бұл жерде індет анықталғандардан 151 адам және пневмониядан 64 адам қайтыс болды. Соңғы аптада – 17-23 тамыз аралығында 1685 адамда COVID-19, 4138 науқаста пневмония расталды. КВИ-дан 108, пневмониядан 40 адам бақилық болды.

Брифингке бейнебайланыс арқылы қосылған еліміздің бас педиатры, Педиатрия және балалар хирургиясы ғылыми орта­лығының басқарма төрағасы Риза Боранбаева мультижүйелік қабыну синдромы – Кавасаки синдромы туралы баяндады.

«Балалар мен жасөспірімдерде кездесетін мультижүйелік қабыну синдромы – уақытша COVID-19 індетімен қабаттасқан, аурудан жазылғаннан кейін болатын иммунологиялық құбылыс. Яғни COVID-19-ға шалдыққан балаларда 3-5 апта өткен соң дамитын инфекциядан кейінгі синдром. Мультижүйелік қабыну синдромының тағы бір атауы – Кавасакиге ұқсас синдром. Өйткені мұның клиникалық белгілері Кавасаки ауруына ұқсайды, бірақ белгілі бір айырмашылықтары бар. Кавасаки ауруы балаларда ерте дамиды, ал мультижүйелік қабыну синдромы 21 жасқа дейінгі жасөспірімдер мен жастарда да тіркеледі. Кавасаки ауруы бүкіл әлемде өте сирек кездеседі, Қазақстанда жыл сайын 2-5 жағдай анықталады», деді Р.Боранбаева.

Бас педиатрдың айтуынша, бұл дертке COVID-19 жұқтырған балалардың барлығы шалдықпайды. Тек кейбір балаларда Кавасаки ауруына ұқсас клиникалық белгілер байқалады, ол ауыр өтуі мүмкін. Сондықтан ерте диагноз қойып, терапияны уақтылы бастау өте маңызды. 23 тамыздағы жағдай бойынша республикамызда 16 балаға мультижүйелік қабыну синдромы диагнозы қойылды. Оның ішінде 8 бала жақсы нәтижемен емделіп шықса, қалғандары көпбейінді балалар ауруханасында емделуде.

Денсаулық сақтау министрлігі COVID-19-бен ауырған балаларда мультижүйелік қабыну синдромының белгілері болса, бала міндетті түрде көпбейінді балалар ауруханасына жатқызылуы керек екенін ескертеді. Кавасакиге ұқсас синдромы бар науқастарды инфекционист, ревматолог, кардиолог, гематолог, реаниматолог сияқты педиатриялық ма­мандар тобы диагностикалап, емдейді.

Кавасаки синдромының негізгі клини­калық белгілері мынадай:

– температура 24 сағат ішінде 38,5 градустан жоғары болады;

– асқазан-ішек жолдарының зақымдануы – іш ауырады, құсу, жүрек айну, диарея;

– тыныс алу жүйесінің 50%-ы зақымдануы мүмкін. Яғни жөтел, пневмонияның ауыр түріне байланысты ентігу;

– денеге түрлі дәрежеде бөртпелер шы­ғады;

–  конъюнктивит, лимфа түйіндерінің ұл­ғаюы, алақан, аяқ ісінуі мүмкін;

– кеуденің артқы жағында жүрек тұсы ауы­рады, кардиоваскулярлық белгілер болады;

– Тіл, ерін қызарып, алқызыл болады.

Соңғы жаңалықтар

Тарихи жеңіске қол жеткізді

Теннис • Бүгін, 20:12

Нар тұлға

Руханият • Бүгін, 20:10

Екпе салдыру өзекті

Медицина • Бүгін, 20:07

Шетелдік басылымнан

Әлем • Бүгін, 20:02

Аруларымыз алты жүлде алды

Спорт • Бүгін, 19:55

Қазақстанға агробанк қажет пе?

Қазақстан • Бүгін, 19:51

Ұқсас жаңалықтар