– Барлық өтініш білдірген 405 адамның 173-і әйел, соның ішінде жетеуі көпбалалы ана, – деді Ә.Рахметова. – Кандидаттардың жастарына келетін болсақ, 35-тен 50 жасқа дейінгі кандидаттардың үлесі – 46 пайыз, ал 35-ке дейінгілер – 24 пайыз. Қызмет ету салаларын алатын болсақ, 49 пайыздық ең үлкен үлесті білім саласының қызметкерлері алып отыр. Одан кейінгі орында ШОБ өкілдері. Олар 12 пайыздық үлесті иеленген. Сонымен бірге ауыл шаруашылығы, денсаулық сақтау, спорт, мәдениет саласының өкілдері де бар.
Еске сала кететін болсақ, праймеризге қатысушылардың үгіт-насихат жұмыстары 7 қыркүйектен басталып, 3 қазанда аяқталады. Оны кандидаттар өздерінің жеке қаржыларының есебінен жүргізеді. Шетелдік заңды тұлғалар мен азаматтарының қаржыландыруына тыйым салынған. Сондай-ақ мемлекеттік органдардың қаржыландыруына да болмайды.
Ә.Рахметова өзінің сөзінде кандидаттардың дебаттарға қатысып, өздерінің бағдарламасын айтуы міндеттелетінін ескертті.
– Оларға кез келген қатысушы сұрақтар қоя алады. Дебаттың ұзақтығы 90 минуттан аспайды. Қалалық және аудандық мәслихаттарға қатысушылар кем дегенде бір дебатқа, облыстық мәслихатқа өтуден үміткерлер екі дебатқа және Мәжіліс депутаты болуды қалайтындар үш дебатқа қатысуы керек, – деді ол.
Үміткерлерге дауыс беру 1-3 қазан аралығында өтеді.
Солтүстік Қазақстан облысы
