![Ынтымақтастықтың негізгі бағыттарын талқылады](/media/2020/08/27/5-1.jpg)
Оған Армения, Беларусь, Әзербайжан, Қырғызстан, Моңғолия, Ресей, Тәжікстан және Өзбекстан конституциялық әділет органдарының өкілдері, қонақ ретінде Конституциялық сот төрелігі жөніндегі дүниежүзілік конференцияның Бас хатшысы Шнутс Дюрр мырза қатысты.
Іс-шараны ашқан Еуразиялық қауымдастық төрағасы Қ.Мәми осы отырыс алғаш рет онлайн режімде өтіп отырғанын айтты. Оған әлі де халықаралық сипаттағы үлкен қауіп төндіріп отырған COVID-19 коронавирустық пандемиясы себеп болуда.
– Қауымдастық шеңберінде біздің конституциялық-құқықтық саясаттың өзекті мәселелері, соның ішінде қазіргі жаһандық сын-қатерге байланысты мәселелер бойынша тәжірибе және тәсілдер алмасуға мүмкіндігіміз бар. Бұл, әсіресе 30 тамызда атап өтілетін Қазақстан Республикасы Конституциясының 25 жылдық мерейтойы жылында аса маңызды, – деді спикер.
Ұйым мүшелері құқықтық саладағы ынтымақтастықтың негізгі бағыттарын, жарғылық құжаттарды одан әрі жетілдіру мәселелерін, сондай-ақ Қауымдастықтың Конституциялық сот төрелігі жөніндегі дүниежүзілік конференцияның алдағы 5-конгресіне қатысу мәселелерін талқылады. Тараптар Дүниежүзілік конгресс аясында Қауымдастық отырысын өткізу туралы шешім қабылдады.
Азиялық Конституциялық соттар мен балама институттар қауымдастығы және басқа да қауымдастықтармен ынтымақтастық мәселелері әңгімеге түйткіл болды. Өзара іс-қимылды күшейту үшін Азиялық қауымдастықпен ынтымақтастық туралы Меморандумға қол қою ұсынылды.
Сонымен қатар делегация басшылары бір-бірін өз елдерінде болып жатқан іс-шаралар мен одан әрі ынтымақтастық жоспарлары туралы хабардар етті.
Қ.Мәми отырысқа қатысушыларға белсенді ұстанымы, ортақ міндеттерді шешуге дайындығы үшін алғысын білдіріп, 27 тамызға белгіленген Қазақстан Республикасы Конституциясының 25 жылдығына арналған халықаралық бейнеконференцияға (конгреске) шақырды.