Конференцияда бірінші болып сөз алған «Ерекше Таңдау-Шелек» корпоративтік қорының бағдарламалық директоры Захира Бегалиева ерекше қажеттілігі бар адамдар арасында жұмыссыздықты жоюға компьютерлік құзыреттіліктерді меңгермеу себеп болатынын айтты.
– Қазіргі бүкіл әлемге таралған вирустан сақтанудың ең тиімді жолы – оқшаулану. Сол себепті қаншама азаматымыз өздерінің жұмыс орындарын тастап, қашықтан еңбек етуге көшті. Осы ретте көп адам, соның ішінде мүмкіндігі шектеулі қызметкерлер компьютерлік құзыреттіліктерінің төмендігінен жұмыстарынан айырылып қалды. Бүгінде елімізде 695 мың мүмкіндігі шектеулі азамат бар. Сондағы 424 мың еңбекке қабілетті азаматтың тек 112 мыңы ғана, яғни 26 пайызы жұмыспен қамтылған. Бұл – Еңбек және халықты әлеуметтік қорғау министрлігінің 2020 жылғы дерегі. ЭЫДҰ елдерінде мұндай көрсеткіш 40 пайызды құрайды. Осы мәселеге жауапты министрлік мүгедектерді жұмыспен қамту көрсеткішін 2021 жылға қарай 30 пайызға жеткізуді мақсат етіп отыр. Биылғы көктемде жүргізілген сауалдаманың нәтижесінде мүмкіндігі шектеулі азаматтардың көбі ақпараттық технологиядан бейхабар екені анықталды. Сол сауалдамаға қатысушылардың басым бөлігі SMM, онлайн-сауда, жарнама, бағдарламалау бойынша оқығысы келетінін жеткізді, – деді З.Бегалиева.
Оның айтуынша, «Ерекше Таңдау-Шелек» корпоративтік қоры осы мәселелерді ескеріп, «LIDERZ» жобасын қолға алған. Жобаны жүзеге асыруға «Samuryk-Kazyna Trust» әлеуметтік жобаларды дамыту қоры серіктес ретінде қолдау көрсетіп отыр. Мүмкіндігі шектеулі жандар онлайн-мектепте компьютерлік сауаттылық, SMM-менджмент, графикалық дизайнер, типография секілді қазіргі таңда сұранысқа ие мамандықтардың курсынан өте алады. Ұйымдастырушылар жоба аясында білім алған азаматтарды оқытып қана қоймай, жұмысқа орналасуына көмектесуді де көздейді.
Ал Ақпарат және қоғамдық даму министрлігі жанындағы Азаматтық қоғам істері комитетінің төрағасы Мадияр Қожахмет еліміздегі мүмкіндігі шектеулі азаматтардың әлеуметтік мүмкіндігін арттыру ең өзекті мәселелердің біріне айналғанына тоқталды.
– Үкіметтік емес ұйымдар ерекше қажеттіліктері бар адамдарды жұмысқа орналастыруда, білім беруде, физикалық және эмоцианалды тұрғыда дамытуға жаңа шешімдер қабылдай алады. Олардың көпшілігі қазірдің өзінде әлеуметтік кәсіпкерлікпен айналысып, осы бағытта да жемісті жұмыс істей алатынын, бәсекеге қабілетті бола білетінін дәлелдеді. Бірақ әлеуметтік кәсіпкерлікпен айналысатын ҮЕҰ саны – жалпы ұйымдар санына шаққанда өте аз. Сондықтан осындай ұйымдардың қатарын көбейту керек. Ал пандемия бізге заманауи қызметтер адамдардың физикалық мүмкіндіктеріне емес, компьютерлік механизмдерді меңгеру мүмкіндігіне байланысты болатынын көрсетті. Сол себепті ІТ саласындағы қызметтерге мүмкіндігі шектеулі азаматтарды қарқынды даярлау қажет. Ал осы мақсатта қолға алынып отырған «LIDERZ» жобасы мүмкіндігі шектеулі азаматтарға өзін дамытуда мүмкіндіктердің шексіз екеніне тағы бір мәрте дәлел бола алады, – деді М.Қожахмет.
