Минскіде 90 кило салмақтағы Валерий Резанцевтің қарқынына ешкім шыдамады. Вадим Псаревтай майталман маманның қол астында жаттыққан 29 жастағы алматылық балуан барлық қарсыластарын тас-талқан етіп, финалда әлем чемпионатының екі дүркін күміс және қола жүлдегері, Еуропа чемпионы Стоян Николовты сан соқтырды. Сөйтіп ол қатарынан бесінші рет төрткүл дүниенің теңдессізі деп танылды. Бұл – рекордтық көрсеткіш! Оған дейін кейіпкеріміз Эдмонтонда (1970), Софияда (1971), Тегеранда (1973) және Катовицеде (1975) қарсылас шақ келтірмеген еді. Сол жарыстардың үшеуінде ол есімі жоғарыда аталған болгариялық балуаннан басым түсті. В.Резанцевтің рекордын ұзақ уақытқа дейін ешкім бұза алмады. Тек арада 20 жыл өткеннен кейін ғана осы нәтижені ресейлік Александр Карелин жаңартты. «Орыс аюы» атанған апайтөс 1995 жылы әлем чемпионатында өзінің алтыншы алтынын олжалады.
Тағы бір айта кетерлік жайт, 1976 жылы Монреальда алауы тұтанған Олимпия ойындарының шешуші сынында В.Резанцев дәл осы С.Николовтан айласын асырып, «мәңгі тозбас» атаққа екінші мәрте қол жеткізгені де жанкүйерлердің жадында.
82 кило салмақ дәрежесінде белдескен Анатолий Назаренко үшінші рет әлем чемпионы атанды. Ол да Вадим Псаревтің шәкірті. Алматының төл тумасы Эдмонтон мен Катовицеде топ жарса, Софияда күміспен күптелді. Минскіде 26 жастағы Анатолий алдына жан салмады. Қазақстандық спортшы ақтық айқаста румыниялық Йон Енакені еңсерді. Жалпы, А.Назаренконың жоғарыдағы табыстарынан бөлек, Мюнхен Олимпиадасының күміс жүлдегері және Еуропаның екі дүркін чемпионы деген атақтары тағы бар.
74 кило салмақта 22 жастағы Анатолий Быковтың бақ жұлдызы жарқырай жанды. Білікті бапкер Виктор Ермаковтан тәлім-тәрбие алған ол сол жылы ғана Алматыда өткен КСРО чемпионатында бас жүлдені олжалап, дүниежүзілік додада өнер көрсету құрметіне бөленген еді. Жер-жаһанның мықтылары жиналған жарыста жас жігіт ел сенімін ақтады. Беларусьтың астанасында барлық бәсекелесінен басым түскен Анатолий алтын тұғырдан қол бұлғады. Финалда ол болгариялық Янко Шоповты шаң қаптырды. А.Быковтың одан кейінгі жүріп өткен жолы да жарқын жеңістерге толы болды. Жерлесіміз 1976 жылы Монреаль Олимпиадасында алтын алса, 1980 жылы Мәскеуде күміске қол созды. 1978 жылғы Софиядағы әлем біріншілігін екінші орынмен қорытындылады.
Қазақстан спортының даңқын асқақтатқан айтулы балуандардың барлығы да қазіргі кезде жырақта өмір сүріп жатыр. Атап айтсақ, 73 жастағы Валерий Резанцев – Ресейде, 71 жастағы Анатолий Назаренко АҚШ-та, ал 67 жастағы Анатолий Быков Канадада ғұмыр кешуде.
Минскіде жалауы желбірген жарыста классикалық күрестен 10 салмақ дәрежесі бойынша белдесулер өтті. Соның сегізінде КСРО құрама командасының мүшелері бас жүлдені олжалады. Жоғарыда есімдері аталған балуандардан бөлек, новосібірлік Владимир Зубков (48 кило), ульяновскілік Виталий Константинов (52 кило), нижнийновгородтық Фаргат Мұстафин (57 кило), әзербайжандық Нельсон Давидян (62 кило) және тулалық Шәміл Хисамутдинов (68 кило) сынды саңлақтар алдарына жан салмады. Ал өзге екі салмақта Болгарияның қос батыры – Камен Горанов (100 кило) пен Александр Томов (+100 кило) топ жарды.
Дәл сол күндері Минскіде еркін күрес шеберлері де әлем чемпионатының жүлделерін сарапқа салды. Бұл жарыста да КСРО құрамасы командалық есепте көш бастады. Тарқатып айтсақ, Павел Пинигин (68 кило), Руслан Ашуралиев (74 кило), Леван Тедиашвили (90 кило) және Сослан Андиев (+100 кило) оза шапты. Жапонияның жігіттері қос алтынды қоржынға салды. Олар – Юдзи Такада (52 кило) мен Масао Арай (57 кило). Моңғолияның да нәтижесі дәл сондай. Бұл елдің өрендері арасында Зэвэгийн Ойдов (62 кило) пен Хорлоогийн Баянмұңхтың (100 кило) мерейлері үстем болды. Сондай-ақ болгариялық Хасан Исаев (48 кило) пен германиялық Адольф Зегер (82 кило) әлем чемпионы атанды.
