Әсіресе, әлемді әбігерге салған пандемия кезінде Қазақ елінің алған бағыты мен ұстанған жолынан жаңылмауы үшін ауыз толтырып айтуға болатын ауқымды ұсыныстар жасалып, тиісті тапсырмалар берілді. Осылайша, аталған Жолдауда маңызды стратегиялық, әлеуметтік, құқықтық салаларға баса назар аударылды. Қоғамдық қатынастардың барлық саласында орын алып жатқан өзекті мәселелер көтерілді және оны шешу жолдары айқындалды. Бұл қадамның барлығы ең алдымен ұлттық қауіпсіздікті қамтамасыз ету мақсатында жасалып отырғанын да жақсы түсінеміз.
Сонымен қатар әрбір әрекетте әділдік, адалдық, теңдік қағидаларын ұстану да аса маңызды екенін ұғындық. Мемлекеттік кірістерді бөлуде де осы ұстанымнан жаңылмағанымыз жөн. Жаңа әлеуметтік кодекстің де отандастарымыз үшін маңызы артады деп сенемін. Бұл ретте, мемлекеттің қоғаммен, азаматтық бақылаумен өзара әрекеттесу мәселесі де ел Президентінің ерекше назарында екенін айту маңызды болып отыр. Себебі, қоғам – мемлекеттік органдардың қызметін бағалау, жоспарлау және орындау кезінде сенімді серіктес іспетті.
Заңгер ретінде мен үшін ауқымды құқықтық блок маңызды болды. Заң үстемдігін мықтап орнату қажет. Адамдардың конституциялық құқығы барлық салаларда қорғалуға тиіс. Соның ішінде полиция, прокуратура, сот және өзге де мемлекеттік органдар бар. Мен осыны қолдаймын. Азаматтарды айыптаушылық бағыттан алшақтап, отандастарымызға сервистік қызмет көрсетуге ұмтылғанымыз жөн болар еді. Ол үшін кадр таңдау мәселесінде әрдайым ашықтық болуға тиіс. Қай салада болсын, қоғамдық бақылауды қамтамасыз ете білуіміз керек.
Марат БӘШІМОВ,
Еуропалық құқық және адам құқықтары институтының директоры
