Жол ережесінің бұзылуы жиі кездеседі. Полиция қызметкерлері көлік жүргізушілердің қай ережені жиі бұзатындығын сараптаған болатын. Соның ішінде жылдамдықты арттыру көп орын алады. Осы себепті жол апатының да қасірет әкеліп жататындығы жасырын емес. Сондай-ақ, көлік жарығын қоспау да оқыс оқиғаларға себепкер. Облыстық жергілікті полиция қызметі басқармасының бастығы Серік Баймұқановтың айтуына қарағанда, көлік жарығын қоспағандарға қатысты 9 мыңға жуық құқық бұзушылық анықталған. Қауіпсіздік белдігін тақпаудың алты мыңнан астам дерегі тіркелген. Ал, ішімдік ішіп, жолға шыққан жүргізушілердің 53-і өмір бойы көлік жүргізу құқығынан айырылып отыр.
Тәртіпті осылайша қатаңдатпаса болмайды. Әрбір оқыс оқиға әлденеше адамның ғұмыры. Абай болғанға, жауапкершілікті ұмытпағанға не жетсін.
