Президенттің де «Үкіметке қағазбастылық пен бюрократияға салынбай, Сыбайлас жемқорлыққа қарсы іс-қимыл агенттігі берген ұсыныстарды бір ай мерзімде жан-жақты пысықтауды тапсырамын. Соның нәтижесі бойынша нақты шаралар кешені жасалуға тиіс. Негізгі мақсат – жемқорлықтың тамырына балта шабу, оны түбегейлі жою» дегені бар емес пе?!
Әлеуметтік желіде пікір қалдырушылардың арасында «бармақ басты, көз қысты жоқ па?» дегендей сауалдар кездескен соң біз де өз тарапымыздан мәселенің анық-қанығына көз жеткізбек болдық.
– Мұндай әжетхана салғанша Аққайнар, Қызыл жұлдыз, Қайыңды ауылдарына жол салынса, Берел музейінің тұсынан Бұқтырмаға аспалы көпір тартылса, туристер үшін әлдеқайда тиімді болар еді, – дейді қоғам белсендісі, журналист Дарын Нұрсапаров.
Әрине Бұқтырманың оң жағалауындағы жолдың республикалық маңызы болмаған соң асфальт төселмегені рас, төселуі де екіталай.
Даудың басы әжетхана құрылысына жауапты мекемеде болса керек деп, «Жарма Құрылыс Газ» ЖШС басшылығына хабарласқан едік. Катонқарағай ауданындағы әжетханалардың жұмысымен айналысып жүрген аталған мекеме басшысы Виктор Исабаевтың айтуынша, тек дәретхана құны 3 млн теңгенің төңірегінде.
– Жіліктеп айтар болсам, кабинаның ішінде су жылытуға арналған бойлеры, екі унитазы, қол жуғыштары бар. Едені шірімеуі үшін алюминийден төселген. Барлығы да сапалы. Ал қалған қаржы смета құжаттарына сәйкес тиісті жеріне жеткізілуіне, орнатылуына жұмсалады. Оның ішінде жұмысшылардың еңбегі, экскаватор сынды техникалардың қызметі бар, – деп түсіндірді В.Исабаев.
«Kazakh Tourism» ұлттық компаниясы» акционерлік қоғамы қызметкерлері: «Шығыс Қазақстан облысының 8 ауданына республикалық бюджеттен 104 млн теңге бөлу арқылы 17 санитарлық-гигиеналық торап (СГТ) орнату жоспарланған. Бүгінге дейін 5 СГТ орнатылып, пайдалануға беру үшін электр желісін жеткізу күтілуде. Бұл павильондарды биыл 10 қыркүйекте электр желісіне қосу жоспарланған» дейді.
Әзірше санитарлық-гигиеналық торап Катонқарағай ауданының Приморск ауылындағы жағажайға, Үлкен Нарын ауылындағы «ЗНП» жанар-жағармай құю стансасының жанына, республикалық күре жолдан Сөгір ауылына бұрылыста, Берел ауылына және Берел қорық-мұражайы жаққа орнатылды.
– Берел ауыл болғанмен, бұл жаққа бергісі батысымыздан, арғысы шетелден туристер көп келеді. Мейлі шетел, мейлі өзіміздің туристер келсін, санитарлық-гигиеналық тораптың болғаны дұрыс. Салынған әжетханалар қараусыз қалмайды. Ол жағын ойластырып қойдық. Ал облыс орталығынан Берелге дейін жол сайрап жатыр, – дейді Катонқарағай ауданының әкімі Ренат Құрмамбаев.
Сайып келгенде дәл осындай заманауи жылы дәретханалар Катонқарағай ауданына ғана қойылмайды. Облыстық туризм және сыртқы байланыстар басқармасы мамандарының айтуынша, «Жұмыспен қамтудың жол картасы-2020» бағдарламасы аясында Алакөл демалыс аймағы мен Абай ауданындағы Қоңырәулие үңгірінің маңына, Сібе көліндегі муниципалды жағажайға, Глубокое ауданындағы «Алтай Альпісі» тау шаңғысы курортына және Тарбағатай ауданындағы Ырғызбай ата ескерткішінің жанына да қойылады. Жалпы саны туристік рекреациялық аумақтарға 17 дәретхана салу қолға алынған.
Шығыс Қазақстан облысы
