Қоғам • 09 Қыркүйек, 2020

Мүмкіндігі шектеулі жандарға пойыз билеттері 50%-ға арзандады

261 рет көрсетілді

2019 жылдың 1 шілдесінен бастап "Mobius" жол жүру билеттерін ресімдеудің жаңа жүйесіне толық көшу жүзеге асырылды. Бұл электронды жүйе халыққа билет сатып алу шарттарын едәуір жақсартты, деп хабарлайды Egemen.kz ИИДМ баспасөз қызметіне сілтеме жасап.

Сондай-ақ орын болмаған жағдайда жолаушыға өтінім жасауға мүмкіндік беретін "күту парағы" сияқты жаңа функциялар пайда болды. Сол бойынша бос орын пайда болғанда (билеттер қайтарылған жағдайда) жолаушының электронды поштасына хабарлама жіберіледі. Бұл ретте жолаушының деректерін ауыстыру мүмкін емес. Осылайша жолаушыларды ауыстыру мүмкіндігі алынып тасталды.

Сонымен қатар 2019 жылдың тамыз айында жолаушыларды тасымалдау ережелеріне өзгерістер енгізілді. Соған сәйкес барлық топтағы мүмкіндігі шектеулі жандарға, сондай-ақ мүгедек балаларға әлеуметтік маңызы бар бағыттарға билет 50% жеңілдікпен сатылады.

"Тұлпар-Тальго" коммерциялық пойыздарында (субсидияланбайтын) тасымалдаушының қалауы бойынша мүмкіндігі шектеулі адамдар үшін мамандандырылған орындарға 70% жеңілдік белгіленген.

Сонымен қатар, 2020 жылғы 26 маусымынан бастап bilet.railways.kz сайтында мүмкіндігі шектеулі жандар үшін жеңілдікті билеттерді онлайн ресімдейтін жаңа қызмет пайда болды Ондай билеттерді онлайн ресімдеу үшін жолаушы "Жолаушылар тасымалы" АҚ билет кассасында (бір рет) тіркеуден өткізіп, бірегей символдар жиынтығы бар "Мейірім" электронды дисконттық картасын алуы қажет. Тіркелгеннен кейін жолаушы билеттерді үйден шықпай-ақ жеңілдетілген бағамен онлайн сатып ала алады. Электронды карта белсендірілген сәттен бастап бір жыл бойы жарамды болады. Оның мерзімін ұзарту жолаушыдан өтінімді қайта алмай-ақ жүргізіледі.

Соңғы жаңалықтар

Ұқсас жаңалықтар