Батыс Қазақстан облысының тартуы болған музыка мектебінде 550 орынға арналған үлкен концерт залы, конференция залы, оркестр, хор сыныбының бөлмелері бар. Заманауи үлгіде салынған нысанда 120 бала өнердің 18 түрінен дәріс ала алады. Атап айтқанда, мұнда оқушыларды домбыра, фортепиано, скрипка, баян, саксафон, қобыз, гитара, ұрмалы аспаптар, вокал, жетіген, ксилофон, литавра сияқты музыкалық аспаптарда ойнауға баулиды. Қазіргі таңда, аталған сыныптарға дарынды балаларды іріктеу арқылы қабылдау жұмыстары басталған. Мектепте жас өнерпаздарға консерватория түлектері ұстаздық етеді. Яғни, кәсіби музыкалық білімі мен шеберлігі жоғары мамандар мұғалім ретінде қабылдануда. Келешекте үлгерімі жақсы шәкірттерден жоғары деңгейлі оркестр құрылатын болады.
Қос қабаттан тұратын сәулетті ғимарат музыкалық аспапта сабақтар өтуге барынша лайықталған. Мәселен, мектептегі барлық оқу сыныптары акустикалық заңдылықтарға сай жабдықталып, әрбір сыныпқа дербес компьютерлер мен интерактивті тақталар орнатылған.
Алдағы уақытта Музыка мектебінің алдына вальс королі Шәмші Қалдаяқовтың ескерткіші қойылады. Сондай-ақ «Ақжайық» музыка мектебі композитор Шәмші Қалдаяқовтың атымен аталмақ. Бұл жөнінде облыс әкімі Ө.Шөкеев Мәдениет және спорт министрі А.Райымқұлованың Түркістан облысына сапары аясында мәлім еткен болатын. Облыс әкімі Өмірзақ Шөкеев музыкалық мектепке барған сапарында, сондай-ақ өнер ордасының материалдық-техникалық базасын күшейтуді тапсырды.
Түркістан облысы