Бұл тізімнің көшін каталониялық «Барселона» командасының шабуылшысы Лионель Месси бастап тұр. Аргентиналық шабуылшы бір жылдың ішінде 126 миллион доллар табыс тапқан. Оның 92 миллионын Месси жалақы ретінде алса, қалған 36 миллион доллар табыс жарнамадан түскен. Басылымның мәліметі бойынша, шабуылшының ең ірі демеушісі Adidas компаниясы екен. Бұл компания оған жылына шамамен 20 миллион доллардай пайда түсіріп тұрады.
Рейтингтің екінші сатысында туриндік «Ювентус» командасының ойыншысы Криштиану Роналду тұр. Португалия құрамасы шабуылшысының жылдық табысы – 117 миллион доллар. Ол италиялық командадан 70 миллион доллар жалақы алса, 47 миллион доллар жарнамадан келген. Роналдудың ең ірі демеушісі – Nike компаниясы. Америкалық компания жарнама үшін шабуылшыға 20 миллион береді. 10 миллионды ол әлеуметтік желі арқылы тапқан. Жалпы бұл футболшының барлық әлеуметтік желілеріндегі оқырмандар саны 457 миллион адам. Жуырда ғана ұлттық құрамасы сапында 100-ші голын соққан шабуылшы қалған табысты түрлі демеушілерден алған.
Үздік үштікті франциялық «Пари Сен-Жермен» командасының шабуылшысы Неймар түйіндеп тұр. Бразилиялықтың табысы – 96 миллион доллар. 28 жастағы бұл ойыншыға париждік команда 70 миллион доллар жалақы төлейді. Қалған табыс – жарнамадан. Ол жуырда Nike компаниясымен келісімшартын бұзып, Puma компаниясымен шартнама жасаған. Бұл келісімшарт бойынша Неймар компаниядан 15 миллион доллар алады. Қалғанын футболшы әлеуметтік желі және де басқа демеушілерінен алып отыр.
Тізімнің төртінші сатысына бұл күндері әлемнің ең қымбат футболшысы саналып жүрген Килиан Мбаппе жайғасыпты. Өткен маусымда 18 гол соғып, Франция біріншілігінің үздік сұрмергені атанған шабуылшының жалақысы 28 миллион доллар. Бұл команданың басқа футболшыларымен салыстырғанда аз жалақы. Сол үшін де Мбаппе маусым соңында жалақысын көтермесе, кетемін деп отыр. Жуырда ғана коронавируспен ауырып, емделіп шыққан шабуылшының жарнамадан түсетін табысы 14 миллион доллар көрінеді.
Бесінші орын Мохаммед Салахқа бұйырыпты. Мысыр құрамасы мен ағылшындық «Ливерпуль» шабуылшысының табысы – 37 миллион доллар. Салахтың бір жылдық жалақысы – 24 миллион. Жарнамадан түсетін табысы – 13 миллион. Ол Мысыр елінде танымал тұлғалардың бірі болғандықтан, жарнамадан түсетін табыстың көбін өз елінен алады.
Сондай-ақ тізімнің үздік ондығының қатарында Поль Погба («Манчестер Юнайтед», 34 миллион. 28+3), Антуан Гризманн («Барселона», 33 миллион. 28+5), Гарет Бэйл («Реал», 29 миллион. 23+6), Роберт Левандовски («Бавария», 28 миллион. 24+4), Давид де Хеа («Манчестер Юнайтед», 27 миллион. 24+3) секілді футболшылар бар.