«Пирамидаға» алдану – соқыр сенімнің нәтижесі

Қаржы • 18 Қыркүйек, 2020

«Пирамидаға» алдану – соқыр сенімнің нәтижесі

28 рет көрсетілді

Жыл басынан бері Ішкі істер органдары қаржы пирамидаларын ұйымдастыру мен құру бойынша 217 қылмыстық істі тергеп, 116 істі сотқа жолдады. Бұл туралы министрліктің Тергеу департаментінің бастығы Санжар Әділов хабарлады.

Арнұр АСҚАР

Онлайн брифингте айтылғандай, қазіргі таңда жалпы саны 79 күдікті жауапқа тартылуда. Тергеу департаменті түрлі қаржы пирамидаларына қатысты 13 қылмыстық істі тергеп жатыр.

– Мәселен, «Гарант 24 Ломбард», «ЕЅТАТЕ Ломбард» және «Тиімді қарыз» компанияларына қатысты жәбірленушілерден 17 мыңнан астам шағым түсті. Олар 22 млрд теңгеден астам материалдық залал шеккені анықталды. Осы ұйымдардың басшыларына қатысты 32 қылмыстық іс тіркелді, 51 күдікті қылмыстық жауапқа тартылуда, 7 күдіктіге іздеу салынды, – деді С.Әділов.

Қаржы пирамидалары туралы қылмыстық істерді тергеу аясында Қазақстаннан тыс жерлерде де күдіктілерді ұстау шаралары жүргізілуде. Жақында Ұлттық гвардияның арнайы борты Молдовадан, Ресейден және Қырғызстаннан үш күдіктіні елге алып келді. Қазір олар тергеліп жатыр. Бұл үш күдіктіден құқық қорғаушылар 70 млн теңгеден астам ақша тәркілеген.

Сондай-ақ Qnet компаниясының өкілдеріне қатысты «Қаржылық (инвестициялық) пирамида құру және оны басқару» бабы бойынша 20 қылмыстық іс тергеліп жатқаны айтылды. Аталған компанияның бас кеңсесі Малайзияда орналасқан. Адамдарды түрлі зергерлік бұйымдар сату арқылы желілік маркетингке тартады. Бастапқы жарнасы 30 доллардан басталады. Қазіргі таңда Qnet алдап соққан азаматтардан 211 арыз-шағым түсті. Материалдық шығын мөлшері 160 млн теңгені құрады. Республика бойынша 29 қылмыстық іс тергеліп жатыр. Қазір жедел тергеу шаралары жүргізілуде. Малайзияға халықаралық тергеу тапсырмасы жолданған.

С.Әділов тұрғын үй құрылысын кооператив құру арқылы жүргізген кейбір компаниялардың үстінен де қылмыстық іс қозғалып жатқанын айтты. Мәселен, елордадағы Expo New Life тұрғын үй кешені үлескерлерінің өтінішімен «Шанг Хи Груп» ЖШС-ның басшылары тергеліп жатыр. Бұл қылмыстық іс бойынша Тергеу департаменті екі эпизод тіркеген, салымшылар шеккен залал көлемі 2 млрд теңгеден асады.

Сол сияқты Маңғыстау облысында «Махаббат» тұрғын үй кешенін салуға байланысты да қылмыстық іс қозғалды. Мұнда 21 үлескер жәбірленуші бар, залал 252 млн теңгеден асады.

– Тергеу тәжірибесі көрсеткендей, қаржы пирамидалары – тез байып кеткісі келетін, мол табыс табуға уәде беретін агрессивті жарнамаға қарсы тұра алмайтын азаматтарымыздың соқыр сенімінің нәтижесі. Біз тұрақты түрде БАҚ арқылы халыққа қаржы пирамидаларына қатысты қылмыстық істер туралы түсіндіру жұмыстарын жүргіземіз, бірақ бұл – жеткіліксіз. Мұндай ауқымды жұмысты мүдделі мемлекеттік органдар – Ұлттық банк, Қаржы министрлігі, Ақпарат және қоғамдық даму министрлігі де жүргізіп жатыр, – деді тиісті департамент басшысы.

Күннің маңызды және өзекті жаңалықтарын «Егемен Қазақстан» телеграм каналынан оқыңыз