Астанадағы Бейбітшілік және келісім сарайында шығармашыл жастардың Халықаралық XVI «Шабыт» фестивалі салтанатты жағдайда ашылды.
Астанадағы Бейбітшілік және келісім сарайында шығармашыл жастардың Халықаралық XVI «Шабыт» фестивалі салтанатты жағдайда ашылды.
Міне, биыл ол он алтыншы мәрте өнерлі жастардың шығармашылығын шыңдайтын жарыс алаңына айналып отыр.
Алдыңғы жылы 8 аталым бойынша «Шабыттың» шыңына шығып, гран-при иеленген Әйгерім Бекетаева, Толқын Тұрысбеков, Рахат Жақсыбай, Олжас Құрманбек және Президенттік кубок иегері Мұхтар Өселбаев өз лебіздерін білдірді.
Аталмыш фестивальдің ашылуына орай Астана қаласының әкімі И.Тасмағамбетовтің құттықтау сөзін Астана қаласы Мәдениет басқармасының басшысы Болат Мажағұлов жеткізді. «Өнер жолы қашан да күрделі, табиғи талантты, тынбас еңбекті, тума дарынды талап етеді. Бұл ретте, біздің руханиятымыздың өлшемі мен өресі, ең алдымен, өнегесі мол, талантты да талапты шығармашыл жастарға байланысты. Бүгінгі фестиваль Астананың ең алғаш Арқа жеріне қазығын бекітіп, елордалық мәртебесін алған 1997 жылдан бастап, жыл сайын жас таланттардың талабын шыңдап, арманына қанат байлап келеді. Бүгінде талай жастардың есімін елге танытуда бұл байқаудың атқарар рөлі орасан зор деп айтуға болады», – делінген өнер мерекесіне қатысушыларға арналған бұл құттықтауда.
Салтанатты жиында «Шабыт» фестивалінің 2010 жылғы гран-при иегері Жәмила Жарқынбаева, «Астана сити балет» модерн-балет мектебінің бишілері және музыкант Руми, «Астана-Опера» театрының солистері Әйгерім Бекетаева мен Тайыр Ғатауов және Қазақ ұлттық өнер университетінің студенттері өз өнерлерін ортаға салды.
Биылғы байқауға еліміздің түкпір-түкпірінен келген жастармен қатар Мәскеу, Уфа, Қазан, Ташкент, Бішкек, Самара, Баку және Варна (Болгария) қалаларынан да өнерлі жастар қатысуда екен. Барлығы 200-ден аса жас өнерпаз «Классикалық музыка», «Бейнелеу өнері», «Халық музыкасы», «Эстрадалық вокал», «Үздік әдеби шығарма», «Хореография» аталымдарында бақ сынасады. Ал, осы аталымдар бойынша қатысушылардың өнерін бағалайтын қазылар алқасының құрамында КСРО халық әртісі, Т.Жүргенов атындағы өнер академиясының профессоры Рамазан Бапов, Қолөнершілер одағының төрайымы, Суретшілер одағының және WCC – Europe мүшесі Айжан Бекқұлова, жазушы, Қазақстанның еңбек сіңірген қайраткері Әкім Тарази, «Дон Милани» институтының профессоры, дирижер Пауло Бионкалано (Италия), Ресей Федерациясының еңбек сіңірген әртісі, П.Чайковский атындағы Мәскеу консерваториясының профессоры Владимир Шиш (Ресей), Украинаның еңбек сіңірген өнер қайраткері, Украина музыка академиясының профессоры Анатолий Семешко (Украина) және Сарыарқа ұлттық аспаптар ансамблінің көркемдік жетекшісі Нұрлан Хамзин бар.
Қарашаның 3-і күні ашылған шара 8-інде өз мәресіне жетеді. Байқауға қатысушыларға дипломант атағы және әрбір аталым бойынша атаулы дипломдар тапсырылады. Ал, жабылу салтанатында болатын гала-концертте гран-при иелері анықталып, Бас жүлде – Қазақстан Республикасы Президентінің кубогы табысталады.
Нұрзада КҮМІСБЕК,
Еуразия ұлттық университетінің студенті.