«Осы уақытта көптеген отбасы қиын жағдайға тап болды. Әлбетте, ешкім пандемия боларын алдын ала білген жоқ, дегенмен елімізде балаларын қажетті техникамен қамтамасыз ете алмайтын отбасылардың бары анық. Ал компьютер қазіргі кезде оқушылар үшін маңызды құрылғыға айналып отыр. Осы орайда біздің «Ұлттық волонтерлік желі» «Best for kids» қоғамдық қорымен бірлесіп көпбалалы отбасыларға компьютерлер сыйлады. Он моноблокты «Kaspi Bank» АҚ сатып алып берді, бір компьютерді волонтер берді. Компьютерлер толығымен диагностикадан өткізілді, пайдалануға дайын», дейді республикалық фронт-офис менеджері Құралай Жарқымбаева.
«Ұлттық волонтерлік желіге» бұл істе қолғабыс еткен «Best For Kids» қоғамдық қоры балалар үйлеріндегі жеткіншектері әлеуметтендірумен айналысады. Отбасыларды Ұлттық волонтерлік желі іріктеді. Оларға бұған дейін де волонтерлерден азық-түлік себеттері түрінде көмек көрсетілген-ді.
Ұлттық волонтерлік желінің еліміздегі волонтерлік мәдениетін арттыруға, балаларды әлеуметтендіруге бағытталған шаралары осымен тоқтаған жоқ. Ұйым ЮНИСЕФ-пен бірлесіп инклюзивті қоғам балаларының құқықтары туралы волонтерлер үшін онлайн-оқытуды қолға алды.
«Әр баланың білім алуға құқылы және мүмкіндігі шектеулі балалар да осы қатарда. Өкініштісі, біздің елде инклюзивті қоғам өкілдері дискриминацияға жиі ұшырайды. Олардың әлеуметтенуіне, білім алуына жағдай жеткіліксіз», дейді Құралай Жарқымбаева.
Волонтерлерге БҰҰ Балалар қорының (ЮНИСЕФ) Қазақстандағы тұрақты өкілі Артур ван Дизен, Ақпарат және қоғамдық даму министрлігінің Азаматтық қоғам істері комитетінің төрағасы Мадияр Қожахмет, ЮНИСЕФ-тің Нью-Йорктегі өкілі Элеанор Зейтлин, ЮНИСЕФ ізгі ниет елшісі, белгілі шахматшы Динара Сәдуақасова, «Ұлттық волонтерлік желі» қоғамдық қорының атқарушы директоры, «Birgemiz» республикалық волонтерлер Фронт-офисінің басшысы Татьяна Миронюк, «Балалар құқығы» бағытының үйлестірушісі Александра Крашинина, «Инклюзивті қоғам» бағытының үйлестірушісі Әліби Қарамурзин дәріс оқиды.
«Балалар үшін тең мүмкіндіктер қамтамасыз ету – ЮНИСЕФ үшін Қазақстанда да, бүкіл әлемде де маңызды міндеттердің бірі. Бұл шара Қазақстан 1994 жылы қосылған Бала құқықтары туралы Конвенцияға сәйкес балалардың өмір сүру, даму және әлеуетін толық іске асыру құқығын қорғауды білдіреді. Біз тек онымен шектеліп қалмай, «Бапкерлерге арналған тренинг» республикалық мектебінің жұмысын қолға алдық. «Birgemiz» республикалық волонтерлер фронт-офисінің ұйымдастыруымен іске қосылған жоба үйлестірушісі – «Ұлттық волонтерлер желісі» қоры», дейді Қ.Жақсымбаева.
28 тамызда жұмысын бастаған республикалық мектепке республика бойынша 43 адам іріктеліп алынған. Олар сөйлеу мәнерінен бастап бапкерлерге қажет басқа да дағдыларын арттырады. Оқу бағдарламасын талдау, бапкерлерге қойылатын талап-міндеттерге қатысты талқылаулар, балалармен жұмыс негіздерінен бөлек практикалық сабақтар да өткізіледі. Оқыту қазақ және орыс тілдерінде жүргізіліп жатыр.
Ұйымдастырушылардың айтуынша, мектеп жұмысы аяқталғаннан кейін бапкерлер ақпаратты дұрыс жеткізу, балалармен сөйлесу, олармен қарым-қатынас құру, көпшілік алдында сөйлеу, жеке оқу бағдарламасын құру сияқты дағдыларды меңгеріп шығады. Сонымен қатар алғашқы 43 қатысушы үйренгендерін өз өңірлеріндегі бапкерлерге де үйретеді деген жоспар бар.
