Экономика • 24 Қыркүйек, 2020

Астықты ауыспалы егісте өсіру ерекшеліктері

369 рет
көрсетілді
1 мин
оқу үшін

Тамыз айының соңында А.И.Бараев атындағы астық шаруа­шылығы ғылыми-өндіріс­тік орталығындағы ауыспалы егістерді зерттейтін көпжылдық далалық стационарында күздік қара бидай мен күздік бидай дақылдары аңыздық танапта Amazone компаниясының ДМС тұқымсепкішімен тікелей себілді.

Астықты ауыспалы егісте өсіру ерекшеліктері

Аңыздық танаптар күздік да­қылдарға жақсы алғы дақыл болып табылады. Таза сүрі жер танабының орнына аңыз­дық танапта көктемде бір жыл­дық дақылдар себіліп өсіріледі. Тамыз айының бірінші он күндігінде бір жылдық дақылдар (шөптер) гүлдену фазасында жасыл балаусаға шабылады. Шабылғаннан соң 4-5 күннен кейін кепкен соң пішенге жиналып алынады. Пішенді жинап болғаннан кейін аңыз­дық танаптағы арамшөптерге құрамында глифосат бар гербицидпен (Фараон Голд) әр гектарына 1,5 литр мөлшерінде бүркіледі. Осылай гербицидпен бүрку арқылы аңыздық танапта ыл­ғал қоры сақталып және арамшөптер жой­ы­лады. Себіл­ген күздік дақылдар танап­тарын­дағы топырақтың беткі жо­ғар­ғы қабаты толығымен біржылдық дақыл­дардың сабақтары мен қалдықтары арқылы жабылып, нәтижесінде егіс­тік танаптар су және жел эрозиясынан қорғалады.

Астықты ауыспалы егісте күз­дік да­қыл­дарды осылай сеуіп өсіру арқылы егіс алқап­тары тиімді пайдаланылады, мал шаруашылығы үшін қо­сым­ша пішен өнімі алынады және топырақ қаба­­ты эрозияға ұшы­рамайды. Осы атал­ған жұ­мыстар бәрі бір жылдың ішін­де атқары­лады, екінші жылы күздік дақыл­дардан өнім алынады.

Ауыл шаруашылық тауар өн­діруші­леріне ауыспалы егісте күздік дақыл­дарды өсірудің басқа да бірнеше баламалы нұс­қасы бар.

 

Алдаберген ҚИЯС,

ғылыми материалды дайындаған ауыспалы егіс тобының жетекші ғылыми қызметкері