Халқы көп, оның ішінде жұмыссызы да жетерлік, негізінен оралман ағайындардан құралған Мұнайлы ауданында ашылған әрбір жаңа ғимарат, пайдалануға берілген әрбір әлеуметтік нысан – үлкен жаңалық.
Халқы көп, оның ішінде жұмыссызы да жетерлік, негізінен оралман ағайындардан құралған Мұнайлы ауданында ашылған әрбір жаңа ғимарат, пайдалануға берілген әрбір әлеуметтік нысан – үлкен жаңалық.
Жуырда аудан орталығы Маңғыстау ауылында орталық аудандық емхана құрылысы аяқталып, халық игілігіне ұсынылды.
Бір ауысымда 250 адамды қабылдай алатын емханадан жүкті әйелдерге кеңес беру бөлмесі, балалар бөлімшесі бөлек орналасқан. Аудандық аурухана басшылығының айтуынша, емхана қанның әртүрлі талдамаларын тексеретін көп функциялы аппараттармен, заманауи қондырғылармен жабдықталыпты.
Жыл соңына дейін Мұнайлы ауданында тағы төрт дәрігерлік амбулаторияның тұсауын кесу жоспарланған. Ал аурухананың да құжаттары дайындалып, «Дипломмен – ауылға!» бағдарламасы аясында 53 медицина қызметкеріне біржолғы жәрдемақы және 7 маманға тұрғын үй сатып алуға бюджеттік несие тағайындалған.
Оқушысына мектеп жетіспей, тұрғындарға жұмыс пен емхана жетіспей, оқырманға газет-журнал жинақталып бір-ақ баратын, облыс орталығына жақын болса да алыс орналасқан аудандағы бұл ауыз толтырып айтып, көңіл бірлейтін жаңалық болды.
Гүлайым ШЫНТЕМІРҚЫЗЫ,
«Егемен Қазақстан».
Маңғыстау облысы.
––––––––––––––––––
Суретті түсірген:
Серік МАЙЕМЕРОВ.
