Білім беру үрдісінде жаңа тәсілдерді ұсынды

Білім • 29 Қыркүйек, 2020

Білім беру үрдісінде жаңа тәсілдерді ұсынды

48 рет көрсетілді

Қыркүйектің 24-25-і аралығында Сүлеймен Демирел университетінің ұйымдастыруымен «Мәдени көпірлер салу жөніндегі 9-шы халықаралық конференциясы» (ICBCB) өз жұмысын бастады.

Egemen Qazaqstan

Конференция озық технологияның тез дамыған жаһандану үдерісінде әртүрлі мәдениеттердің өкілдерінің арасындағы үйлесімді қарым-қатынас және өзара құндылықтарына төзімділік пен құрмет көрсетуді дәріптейді. Іс-шара аясында Гонконг, Қырғызстан, Пәкістан, Португалия, Сауд Арабиясы, Швеция, Ұлыбритания және АҚШ мемлекеттерінен білім саласының белді сарапшылары білім берудегі жаһандық трендер және құндылықтар бағытындағы ғылыми-зерттеу жұмыстарының нәтижелерімен бөлісіп, заман ағымының салдарынан туындаған өзекті мәселелерді ортаға салады.

Негізгі мақсат – отандық және халықаралық ғалымдармен ғылыми және кәсіби байланыс орнатып, білім саласындағы жаңа сын-қатерлерге оңтайлы шешім табу. СДУ ректоры Қуаныш Ерғалиев онлайн конференцияның ашылуында дүниежүзілік ғалымдар қауымдастығының өкілдері еңбектеріне жеміс тіледі.

– Конференцияның аясында қашықтан білім беруге қатысты, пандемия кезінде білім беру ерекшеліктері бойынша маңызды баяндамалар тыңдалады. Нәтижесінде қазіргі таңда туындап тұрған сын қатерлі жаһандық мәселерге оңтайлы шешімдер табылып, олар тәжірибе жүзінде қолданысқа алынуы мүмкін, – деген болжам білдірді СДУ академиялық істер және ғылыми-зерттеулер жөніндегі проректоры Давронжон Гаипов.

Жалпы, конференцияның бағыты жаһандану дәуірінде жаһандық трендтер және білім берудегі құндылықтар тақырыбы болғандықтан, осы саладағы кәсіби орта өкілдері, ғалымдар, педагог мамандар, зерттеушілер және білім саласындағы индустрия өкілдері де бар. Айта кетсек, қазақстандық «Ұстаз» кәсіби шеберлікті жетілдіру орталығының жетекшісі, Халықаралық Гонконг педагогикалық университетінен қашықтан білім беру немесе ақпараттық коммуникация технологиялар саласының сарапшысы пленарлық баяндамашы ретінде қатысады.

Сарапшылар бірқатар өзекті мәселені қамтуда, оның ішінде: «Білім беру бағдарламалары және педагогика», «Білім беру саласындағы ғылыми-зерттеулер», «Құндылыққа негізделген білім беру», «Білім берудегі ақпараттық-коммуникациялық технологияларды қолдану», «Тілдік білім беру», «Білім берудегі көшбасшылық», математика, инженерия, өнер және биыл Қазақстанда аталып жатқан «Әл-Фараби мен Абай мұралары әлемдік руханият кеңістігінде» бағыттары бойынша ойларын ортаға салады.

– Әуел баста конференцияны СДУ кампусында өткізу жоспарланған болатын. Алайда пандемияға байланысты іс-шара онлайн өткізілуге мәжбүр болды. Осыған байланысты коллоборация мен нетворк жеткіліксіз болуы мүмкін. Бірақ соған қарамастан, 9 мемлекеттің ғалымдары бір платформада өз ой-пікірлерімен бөлісу, талқылау арқылы бір-бірімен танысу және әртүрлі деңгейде ғылыми жобаларға қатысу, ұсыныстар секілді ортақ ынтымақтастықтар жасай алады, – деді Д.Гаипов.