Өнер • 02 Қазан, 2020

Музыка күні мерекеленді

11 рет көрсетілді

1 қазан – халықаралық музыка күні. Айтулы оқиғаға орай кеше «Астана Операның» үлкен залы сахнасында алғаш рет Дж.Пуччинидің аты аңызға айналған Messa di Gloria туындысы орындалды. Театрдың опера солистері, хор және симфониялық оркестр әртістері Қазақстанның еңбек сіңірген қайраткері Ержан Дәуітовтің жетекшілігімен өнер көрсетті.

Messa di Gloria – Джакомо Пуччинидің ең әйгілі туын­ды­ларының бірі, бұған қоса ол ұлы композитордың сирек орындалатын шығармасы саналады.

– Мессаның әрбір нөмірінде айрықша сұлулық бар, бұл – бейнелі, мәнерлі музыка. Като­ликтік шіркеудегі месса – салтанатты ғибадат ету. Аталған шы­­ғарманың айқын музыкалық тақырыптарында Тәңірді мадақ­тау анық естіледі. Діни музыкасы бар бұл туындыға Пуч­чини шығармашылығын біре­гей әрі оған дейінгілердің жұмыс­тарынан өзгеше ететін барлық белгілер тән. Бұл дегеніміз – біз­дің «Тоска», «Турандот», «Богема», «Мадам Баттерфляй» не­месе «Манон Леско» сынды опе­ралардан көріп-тыңдап үй­ренген нәрселердің бәрі – нәзік әуенділік, оркестрге керемет лайықтау, әдеттен тыс үйле­сімді қадамдар. Хор шір­кеу­де ән айтқанда, мінәжат жа­сауға кедергі келтірмеу үшін эмо­циясыз айтуы тиіс деп есеп­теледі. Бірақ біз шіркеуде емес, сахнада орындайтын болған­дықтан, мақсатымыз да басқа: тыңдарман қауым бізбен бірге композитордың партитураға енгізген сезімдерін түйсінуі үшін музыканың бар әсемдігін, ке­меңгер Пуччинидің тереңдігін көрсетуге тырыстық, – деді ға­ла­мат музыка кеші жайында театр­дың бас хормейстері Ержан Дәуітов.

Туындыдағы жеке партияларды театр солистері Рамзат Балакишиев (тенор) пен Талғат Ғалеев (баритон) орындады.

Еске салар болсақ, 2018 жыл­дың желтоқсан айында «Ас­тана Опера» хоры осы шы­ғар­­мамен Ресейдің үш танымал кон­серваторияларының бірі ор­наласқан және көптеген таны­мал музыкалық ұжым жұ­мыс істейтін Сібірдің ірі мәдени орталығы Новосібірде өнер көрсетті. Новосібір мем­лекеттік академиялық опера және балет театрының сахнасында Дж.Пуччинидің Messa di Gloria шығармасы да алғаш рет шырқалды. Классикалық музыкадан хабары бар қаланың талғампаз көрермендері қазақ­стандық әртістердің орындауын үлкен қошеметпен қабыл алған болатын.

Соңғы жаңалықтар

Амманға аттанды

Спорт • Кеше

Қадір түнінің қасиеті

Руханият • Кеше

Алматы қаласында жер сілкінді

Аймақтар • 06 Мамыр, 2021

Ұқсас жаңалықтар