Театр • 08 Қазан, 2020

Қазанда ойнаған «Найзағай»

97 рет көрсетілді

Елордадағы ең көне театр – М.Горкий атындағы академиялық орыс драма театры 120-шы мерейтойлық маусымын ашты. Театр шымылдығы А.Островский­дің әйгілі «Найзағай» әлеуметтік-психологиялық драмасымен түрілді.

Елде белең алған карантин режиміне қарамастан, театрды сағынған көрермендер қатарында Мәдениет және спорт министрі Ақтоты Райымқұлова мен Нұр-Сұлтан қаласының әкімі Алтай Көлгінов те қарт театрды мерейтойымен құттықтай келіпті. Спектакль алдында министр ел Президенті Қасым-Жомарт Тоқаевтың құттықтау хатын оқып беріп, театр қызметкерлеріне мемлекеттік марапаттар табыс етті. Атап айтсақ, «Еңбек ардагері» медалін Қазақстанның еңбек сіңірген әртісі Наталья Косенкоға, «Мәдениет саласының үздігі» Наталья Матвееваға, Қазақстанның еңбек сіңірген әртісі, театрдың бас режиссері Бекболат Пармановқа, «Мәдениет саласының үздігі» төсбелгісін театр директоры Айболат Жанғалиұлына, актерлер Иван Анопченкоға, Оксана Бойкоға, Игорь Сединге, өндіріс бөлімінің бастығы Руслан Мұхамадиевке, бас әкімші Татьяна Шульженкоға, кадрлар инспекторы Жанар Мүбәраковаға тапсырды. Сонымен қатар бірнеше театр қызметкері Мәдениет министрінің және Нұр-Сұлтан қаласы әкімінің алғыс хатымен марапатталды.

Бұл жыл барлығымыз үшін оңай бол­мады. Карантин режімі адамдар­дың құндылық, адами қарым-қатынас тұр­ғысындағы ойын түбегейлі өзгертті. Сон­дықтан да бәріміз әр сәтімізді бағалауды үйрендік. Мемлекетіміздің өнерге деген шексіз қамқорлығының арқасында еліміздегі театрлар шектеулі көрерменді қабылдап, жаңа театр маусымын ашып, шығармашылық жұмыстарын жалғастырып жатыр. Міне, сол өнер ордаларының қа­тарында 120 жылдық тарихы бар орыстың ұлы жазушысы М.Горький атындағы ака­­демиялық орыс драма театры да бар. 120 жыл! Аз уақыт емес. Бір ғасырдан ар­тық уақыт көрерменін рухани сусындатып келе жатқан қарашаңырақтың тарихы шын мәнінде тағылымды. Шежірелі ұжым­ның шығармашылық ізденістері артып, көркемдік деңгейі өсіп, лайым көрер­ме­нін қуанта берсін», деп бас шаһар әкімі ұжым­ды жаңа театр маусымының ашылуымен құттықтап, шығармашылық табыс тіледі.

Мерекелік маусым одан әрі А.Остров­скийдің «Найзағай» қойылымына ұлас­ты. Спектакль Ресейден арнайы шақырыл­ған санкт-петербургтік режиссер Рача Маха­таевтың қолтаңбасында астаналық көрер­менмен қауышқан болатын.

Еске сала кетейік, өткен маусымда театр ұжымы барлық санитарлық талаптарды сақтай отырып, М.Макдонахтың «Жастық-адам» («Человек-подушка»), Н.Гогольдің «Неке» («Женитьба») сияқты қойылымдарды жарыққа шығарса, жаңа маусымды А.Островскийдің «Найзағай» («Гроза») атты ең танымал әлеуметтік-психологиялық драмасымен бастап отыр.

Атақты спектакльдің сюжеті кішкен­тай кезінен ата-ананың махаббатында өс­кен Катерина есімді әйелдің трагедиялық тағ­дыры туралы баяндайды. Тұрмыс құр­ған соң ол күйеуінің үйінде еріксіз азап ше­геді және қайын енесінің қатыгездігі мен озбырлығының құрбаны болады. Ка­те­ринаның өзін өзі өлтіруі – наразылық, айқай, мейірімділікті сұрау, жақынына деген сүйіспеншілік және кешірім болып табылады. Көрермен А.Островский жаз­ған классикалық драманың біздің дәуірі­міз­дегі өзектілігі мен маңызын жаңа заман бед­е­рінде бағалап, қабылдай алды.

Осы орайда айта кетер бір жайт, ұжым­ның мерейтойлық маусымашар қойылым ретінде Островский драматургиясын таң­дап алуы тегін емес. Театр тарихына дендесек, ұлы драматург А.Островский тарих­қа ұлттық мағынадағы орыс театрының реформаторы және негізін қалаушы ретінде енді. Ол театрға үлкен тәрбиелік мән берді, сондықтан өзін сүйікті ісіне жан-тәнімен арнады. Көрермендер де өз заманында Островскийдің жаңа пьесаларын ықыласпен қабылдады. Олар өздерінің жаңашылдығы мен өміршеңдігін сезінді. Островский драматургиясы жаңа сахналық эстетиканы, жаңа актерлерді талап етті. Сонысымен де Островский мектебі театр әлемінен өз орнын белгіледі.

Қойылымның актерлік құрамы Остров­скийдің осы бір идеясы мен сара жолына сәйкес жоғары деңгейде өнер көрсетті. Өйткені мұнда тек образды ғана емес, сонымен қатар кейіпкерлерге тән портретін жеткізе алу да аса маңызды. Спектакльде ойнаған Людмила Крючкова, Денис Ан­ников, Сергей Маштаков, Ульяна Штиль­ман, Максим Ященко, Екатерина Мак­сим, Александр Лукашевич, Оксана Бой­ко, Данил Хомко, Дмитрий Маштаков, Айжұлдыз Бағланова, Татьяна Степанова, Евгений Карачов бастаған актерлер ойы­ны шын мәнінде талғампаз көрерменді тәнті етті.

Соңғы жаңалықтар

«Аяулы жас келін» атанды

Қоғам • Бүгін, 09:00

Фермерлер дүкені ашылды

Қоғам • Бүгін, 08:58

Көш басында өзгеріс жоқ

Спорт • Бүгін, 08:55

Ширек финалға шықты

Теннис • Бүгін, 08:54

Жалпы есепте топ жарды

Спорт • Бүгін, 08:53

Уәдең қайда, шенеунік?

Қоғам • Бүгін, 08:52

Ұқсас жаңалықтар