Ақмола облысының әкімі Қосман Айтмұхаметов Көкшетауға келген Астана және Қазақстан митрополиті Александрмен кездесті. Митрополит өңір басшысына Көкшетау және Ақмоланың жаңа епископы Серапионды таныстырды.
Ақмола облысының әкімі Қосман Айтмұхаметов Көкшетауға келген Астана және Қазақстан митрополиті Александрмен кездесті. Митрополит өңір басшысына Көкшетау және Ақмоланың жаңа епископы Серапионды таныстырды.
Жүздесу барысында облыстағы іргелі істер жайында әңгіме өрбіді. Өңірдегі өзара түсіністік пен келісім шапағаты ретінде облыс диқандарының биылғы күрделі орақта әр гектардан 12 центнерден астық жинауы атап көрсетілді. Ортақ мүдде жолындағы игі жоспарлар да нәтижелі атқарылып келеді. Бұл облыста тіркелген 180 діни бірлестіктің тұрғындарды жақсылық пен бауырмалдыққа жұмылдырып, мемлекеттік бағдарламалардың табысты орындалуына мүдделілік танытуының жемісі деп бағаланды.
Облыста діни қызмет пен ұстанымдарға құрмет сезімі қалыптасқан. Қазіргі күні 100 мешіт пен 86 намазханада, 25 православие шіркеуінде, 9 католик костелінде және 22 уағыз үйінде діни іс-шаралар жүргізілуде.
Митрополит облыстағы діни ахуалдың тұрақтылығын, этносаралық және конфессияаралық келісімді сақтау мен нығайтуда елеулі жұмыстар атқарылып отырғандығын атап көрсетті. Сонымен қатар, ол Астана қаласында Орталық Азиядағы ең үлкен және ұлық храм құрылысына үлес қосқаны үшін облыс әкімі Қосман Айтмұхаметовке алғысын білдіріп, «Благодарность» орденімен марапаттады.
Митрополиттің облысқа сапарында оның жанында Қарағанды және Шахтинск епископы Севастиан бірге болды.
Бақберген АМАЛБЕК,
«Егемен Қазақстан».
Ақмола облысы.
