Жастар ресурстық орталығының бір топ еріктісі қаладағы Нұркент шағын ауданына елуден астам алма ағашын отырғызды. Жастарды игі бастамаға жұмылдырған «Эко-Алматы» акциясы «Шетcіз қала» және «Жасыл қала» бағдарламалары аясында жүзеге асып отыр. Осылайша волонтерлер қаладағы бос жерлерді гүлдендіруді көздейді. Жалпы, акция аясында тағы да басқа аумақтар қамтылатын болады. Алманың отаны саналатын Алматыда алма ағашын көптеп отырғызудың өзіндік символикалық мәні бар.
«Алматы қаласының демалыс орталықтары және 8 ауданда орналасқан Жастар ресурстық орталықтарының қызметкерлері мен волонтерлері «Эко-Алматы» таза қала акциясын жалғастыруда. Жобаның мақсаты – қаламызды одан әрі құлпырту. Алма мен Алматы егіз ұғым. Еліміздің әуе қақпасы саналатын оңтүстік астанамызға келген шетелдіктер көз алдына алманың атасы атанған қала қандай екен деп елестетіп келеді. Шаһардың әр бұрышында алма өсіп тұрса қандай жарасымды болар еді. Біздің басты тілегіміз де осы. Бұл іске әрбір азамат белсенді түрде үлес қосуға тиіс. Тек науқан ретінде қабылдамай, өзі еккен ағаштың жетіліп өсуін қадағаласа игі», – дейді Алатау аудандық Жастар ресурстық орталығының жетекшісі Нұрсұлтан Сембаев.
АЛМАТЫ
