Суретті түсірген Ерлан ОМАР, «EQ»
Жыл басында ерікті жастар тобы ең әуелі өңірдегі кәсіптік-техникалық білім беретін оқу орындарында, Қ.Жұбанов атындағы Ақтөбе өңірлік университеті мен М.Оспанов атындағы Батыс Қазақстан мемлекеттік медицина университетінде құрылды. Жыл басында 1000 ерікті жас құрған 35 топтың саны қазір 90-ға артты. Аудан-ауылдарда да жастар белсенділігі артып келеді. Соның ішінде қыздардың белсенділігі күшті. Қазір өңіріміздегі екі мың волонтердің ең ересегі 41 жаста болса, ең кішісі – 14 жаста. Волонтерлердің 62%-ы –қыздар. Топтардың құрамы мынадай: жұмысшы жастар – 45,8%, ЖОО студенттері – 16,5%, кәсіптік-техникалық білім беретін оқу орындарының студенттері – 12,7%, мектеп оқушылары – 20,5%, жұмыссыз жастар және кәсіпкерлер – 4,5%.
Жыл басында Ақтөбе облысында қозғалыстың «Birgemiz» тұжырымдамасы негізінде 43 тармақтан тұратын жұмыс жоспары бекітілді.
«Қоғамдық мәселеге араласу арқылы көпшілік жастардың өмірлік ұстанымдары қалыптасты. Олар қоғаммен қарым-қатынас жолдарын үйренді, ең бастысы – тәжірибе жинақтады. Мен де көп нәрсені үйрендім», дейді облыстық жастар саясаты мәселелері басқармасының басшысы Сәбит Мұқанов.
Төтенше жағдай кезінде облыстық волонтерлік штаб құрылып, «AntiCovid19» тобының жастары Ақтөбедегі провизорлық ауруханалар мен жедел жәрдем бекеттерінің қызметкерлеріне ыстық тамақ жеткізіп тұрды. Сонымен қатар волонтерлер науқастар үшін 13 оттегі концентратор аппаратын, 67 оттегі баллондарын, 146 оттегі жастықтарын жеткізіп берді.
Еріктілер тобы жаз бойы қиын жағдайда қалған балалармен жұмыс істегенін де айта кету керек. Жетімдер үйінен шыққан кәмелет жасына жеткен балалар тұратын «Аяла» орталығында, «Мейірім» жастарды әлеуметтік бейімдеу үйінде және «Жайна» мүгедек балаларды оңалту орталығында жұмыс істеп, көптеген түйткілді сұрақтардың басын ашты. Жастың тілін жас түсінеді демекші, өмірде қиын жағдайда қалған балалар ішкі сырларын тек құрдастарына ғана ақтара алады. Бұл жұмысқа волонтерлер арнайы тренингтер мен семинарларда оқығаннан кейін ғана жіберілді.
«Umit» жобасы бойынша 30 волонтер «Зелло іздеу» командасы тобымен және жергілікті полиция бөлімімен бірлесе жоғалған адамдарды іздестірумен айналысқанын айта кету керек. «Taza alem» жобасы негізінде 3249 белсенді тазалық акциясын өткізіп, табиғат аясында демалушыларға жадынамалар таратты, қоқыс жинады.
«Birgemiz: тaza alem» бағыты бойынша шағын грант байқауынан Ақтөбе облысынан 7 жоба ұсынылып, оның 4 жобасы мақұлданды. Соның арқасында жастар әрбір жобаға 300 мың теңгеден грант алды. Осы шараның арқасында, қазірде қалада, аудан орталықтары мен елді мекендерде тазалық акциялары жиі-жиі ұйымдастырылып, оған қатысушы еріктілер саны да өсіп келеді. Мәселен, халықаралық Жастар күні қарсаңында өткізілген «Таза жағалау» акциясына 400-ден астам жас қатысып, олар 40 тонна қоқыс шығарды.
Аз мерзім ішінде жасақталған топтардың еріктілері осындай қоғамдық маңызы зор істердің ұйымдастырушылары да бола білді. Ең бастысы –жастарымыз қоғамдағы қордаланған мәселелерді көріп қана қоймай, оларды шешуге шын жанашырлықпен кірісіп жүргені қуантады.
