Суретті түсірген Ирина Шенина
– Бірнеше жыл қатарынан зауыт жұмысшылары қала маңына ағаш отырғызуда, – дейді кәсіпорын директоры Сергей Прокопьев. – Бұл «Жасыл белдеу» компаниясы бүгінде жүзеге асырылып жатқан барлық экологиялық бастамалардың, яғни зауыттың қоршаған ортаны газдан тазарту жүйелерін біртіндеп жаңарту, қалдықтарды қайта өңдеу саласында озық технологияларды енгізу, өзен жағалауы аймақтарын тазарту және басқа да көптеген іс-шаралардың заңды жалғасы деуге болады.
Ал Еуразиялық Топ басшылығы «Жерге бақ сыйла» қоғамдық қорына қолдау көрсетуде. Қазір облыс орталығының шетіндегі әртүрлі ағашқа толы тәлімбақ жайқалып тұр. Саялы бақта 2,7 мыңға жуық ағаш өсіп келеді.
– Бұл – болашақтың жасыл орманы мен таза ауасы. Кейінгі ұрпақ бұл жобамызды жалғастырады деп ойлаймын, – деген қор жетекшісі Юрий Гашек көшеттерді металлургтерге тапсыра отырып, ағаштар тамыр жаюы үшін оны қалай дұрыс отырғызу керектігін түсіндіреді. Сондықтан отырғызу алдында әрбір жұмысшы ағашты шұңқырға қандай деңгейге дейін түсіру керек, қанша көлемде құнарлы топырақ қосу керек және қай мөлшерде су қажет екендігі жайындағы нұсқаулықпен танысады.
– Ірі өнеркәсіп орындарының өз жобаларымен шектеліп қалмағаны қандай жақсы! – дейді қоғам белсендісі Юрий Гашек. – Біз жыл сайын кәсіпорынға жүздеген көшет береміз. Ағаш егу, өсіру, суару көп қаражатты қажет етпейді. Тек ниет, еңбек, табиғатқа деген жанашырлық қажет. Жоба аясында өз қолымызбен өсірген жас талдарды экологиялық бағыттағы түрлі жобаларға тегін үлестіреміз. Бірақ бір шартымыз бар – ағаштардың суарылуы қамтамасыз етілуі тиіс. Бақ өсірудегі мақсат – қоршаған ортаны қорғау, экологиялық мәдениетті қалыптастыру. Жасылдандырумен айналысып жүргенде адамдардың экологиялық мәдениеті жеткіліксіз екенін көрдік.
Айтса айтқандай-ақ, компания жылына 6 млн тонна тауарлы хром кенін, 480 мың тонна марганец кенін, 1,8 млн тонна ферроқорытпа өндіреді. Тек қана өндірістік бағыт емес, көгалдандыру да зауыттың экологиялық бағдарламасының бірі. Соңғы бес жылда зауыт жұмысшылары Ақсу қаласында 500-ден астам ақ қайың мен сүмбіл терек отырғызды.
Биыл компания ұзақ мерзімді көгалдандыру жобасын бастады. Өсімдіктердің жерсініп кету үлесін арттыру үшін кәсіпорын жергілікті топырақтың ерекшеліктерін ескеріп, кейінгі күтімге қаражат бөлді. Алдағы алты жылда мұнда 3 мыңнан астам ағаш өсетін «Жасыл белдеу» болмақ.
Енді міне, күздің қазіргідей жылы күндері зауыт жұмысшылары Ертіс өзені жағасында орналасқан кәсіпорынның балалар лагері аумағына 500 түп қарағай отырғызды. Зауыттың ұжымы ағаштардың бір бөлігін энергия және электр цехтары, теміржол бөлімшесі маңына екті.
Жас өскін қарағайлар кәсіпорын аумағындағы «Ұрпақтар саябағында» өсіп келеді. Көктемде болашақ саябақта заманауи суару жүйесі арқылы ағашатар суарыла бастайды.
Павлодар облысы,
Ақсу қаласы
