Қазақтың Тұңғыш Президентінің Абай аманаты мен өсиеті туралы ой-пікірі арғы тарих пен жаңа тарихтың арасын табиғи жалғап, бүгінгі буынға айрықша ой салады. Осыларды көпті көрген кәрі әдебиетші, зерттеуші ретінде жоғары бағалаймын.
Мен – Елбасыммен талай мәрте жолыққан, сұхбаттасқан ғалыммын. Сол кездесулердің бәрі де есімде. Нұрсұлтан Әбішұлы – ұлт тарихын, тұлғалар тағдырын, мәдени мұраны халықтың, ұлттың мүддесімен орайластыра түсінетін қайраткер. Осы елдік түсінікті қайраткерлік ұланғайыр ісінде пайдалана алатын саясаткер. Бұған өскен ортасы мен алған тәлім-тәрбиесі, билік сатыларындағы бай тәжірибесі ықпал еткені сөзсіз.
Дана Абай – Нұрсұлтан Әбішұлының әрдайым оқитын, жиі дәйек алатын тұлғасы. Менің есіме де ұлы ақынның ЮНЕСКО шеңберінде өткен 150 жылдық мерейтойы түседі. Расында, Нұрсұлтан Әбішұлы болмаса, ол кісінің халықарылық беделі болмаса, мерейтой биік деңгейде өтпес еді. Ол кезде мен ақынның академиялық екі томдығын әзірлеген М.О.Әуезов атындағы Әдебиет және өнер институтының директоры едім. «Тойдың болғанынан боладысы қызық» деген, Елбасының арқасында үкіметтік деңгейде атқарылған жұмыстар қаншама оң нәтиже берді. Ескерткіштер де тұрғызылды, ғимараттар да салынды, кітаптар да шығарылды, түрлі жанрда фильмдер де түсірілді. Бұлар – абайтанудың зор биігі болып қалды.
Көпті көрген, дана да дара қайраткер деңгейіне еңбегімен көтерілген Нұрсұлтан Әбішұлы осы мақаласын: «Абайдың сөзі мен ойы біздің күнбе-күнгі тірлігімізге, өркенді өмірімізге кірпіш болып қаланып, бүгінгі өркениет пен алдағы болашақ талабына лайық ұмтылыстарымыздан және игі істерімізден нақты көрініс табатынына кәміл сенемін» деп түйіндепті. Елбасы тұжырымын тұтас ұлттың талабына берілген бата, ақ ниет деп қабылдасақ та болады. Бұл – ұлт даналығына адалдық.
Абай аманаты жаңарған, жаңғырған Қазақстанды шыңдап, жаңа биіктерге бастай бергей.
Серік ҚИРАБАЕВ,
академик
