Суретті түсірген Владимир Воробьев
Парк қызметкері Владимир Воробьев Алтайдың аң-құстарын суретке түсірумен, зерттеумен бұрыннан айналысып келеді. Оның жеке фотоархивінде ұлттық парк аумағында кездесетін аю, қасқыр, құну, түлкі, қоян, елік сынды жануарлардың барлығы дерлік сақталған. Көптеген суреті танымдық фотоальбомдарға да енген.
В.Воробьевтің объективіне ілінген биылғы үлкен олжасы – Арша ементұмсығы мен Алакөз сүңгуір құстары еді. Ол Арша ементұмсығын фотосуретке Таутекелі өзенінің аңғарында түсірген. Табиғатта сирек кездесетін ерекше құсты ең соңғы рет орнитолог С.Стариков Бұқтырманың бойынан 2006 жылы көріпті.
Арша ементұмсығының салмағы – 45-70 грамм ғана. Дене тұрқы шағын болғанымен тұмсықтары мықты. Сүйекті жемістерді оп-оңай шағып жей береді. Балапандарын алғашқыда ұсақ жәндіктермен, кейін дәнмен қоректендіреді екен. Қоразының басы қоңыр, мойны қызғылт, бауыры сұр болады. Мекиенінің түсі солғындау.
Ал Алакөз сүңгуір құсты В.Воробьев биыл Бұқтырма жағалауында таспаға тартыпты. Үйрекке ұқсас бұл құс негізінен Сырдария, Шу, Іле өзендерінің төменгі сағасын және Алакөл, Зайсан көлдерін мекендейді екен. Орнитологтардың айтуынша, 1980 жылдары Алакөз сүңгуір күрт азайып кеткендіктен Қазақстанның «Қызыл кітабына» енгізіліпті.
Катонқарағай ұлттық паркінің аумағы ерекше қорғалатындықтан, сиреп кеткен жануарлардың өсімі байқалады. Ендеше, Алтайға оралған екі құстың да саны артары анық.
Шығыс Қазақстан облысы,
Катонқарағай ауданы
