Жыл басында жоспарланған көптеген мәдени, спорттық іс-шаралар пандемияға байланысты өтпей қалды және бірқатар бюджеттік бағдарлама шығындары қысқартуға ұшырады. Осының есебінен жыл соңында үнемделген қаржы сомасы 6,4 миллиард теңгені құрады. Мәслихат депутаттары үнемделген қаржының 740 миллион теңгесін елдімекендердің инфрақұрылымдық жобаларын аяқтауға қайта бөлуді мақұлдады. Солардың бірі –өткен жылы аяқталуға тиіс болса да, мердігердің жауапсыздығынан тоқтап қалған Ырғыз ауданының Ақши, Шеңбертал, Құрылыс елдімекендеріне газ құбырын жүргізу жобасы.
Сондай-ақ үнемделген қаржыдан аз қамтылған және көп балалы отбасылар үшін қолжетімді пәтерлер салуға қосымша 400 миллион теңге бөлінді. Бұдан өзге Ақтөбе қаласының түбіндегі Жаңақоныс елдімекенінде 140 пәтерлік жатақхана салынатын болды. Мұның бюджеті 100 миллион теңгені құрайды. Облыстық балалар ауруханасының қан ауруына шалдыққан балаларды емдеуге арналған 100 кереуеттік стационар құрылысына да қосымша 255 миллион теңге бөлінді.
Биыл облыста жол құрылысына байланысты республикалық бюджеттің 700 миллион теңгесі игерілмей қалды. Бағдарлама үйлестірушісі – облыстық жолаушылар көлігі және автомобиль жолдары басқармасы осы қаржыны республикалық бюджетке шұғыл түрде қайтаратын болды.
