Абай атындағы Қазақ мемлекеттік академиялық опера және балет театрында Қазақ мемлекеттік қыздар педагогикалық университетінің 1 курс студенттерін «Өткеннің өнегесі – бүгінгінің байлығы» атты студенттер қатарына қабылдау рәсіміне арналған салтанатты жиында қасиетті қара шаңырақтың 70 жылдық мерейтойының алауы ресми түрде жағылды.
Абай атындағы Қазақ мемлекеттік академиялық опера және балет театрында Қазақ мемлекеттік қыздар педагогикалық университетінің 1 курс студенттерін «Өткеннің өнегесі – бүгінгінің байлығы» атты студенттер қатарына қабылдау рәсіміне арналған салтанатты жиында қасиетті қара шаңырақтың 70 жылдық мерейтойының алауы ресми түрде жағылды.
Салтанатты шарау ниверситет алауын алып жүгірген эстафеталық марафонның қызықты сәттері суреттелген бейне баян қойылымын тамашалаумен басталды. Аталмыш мерейтойлық алау өткен айдың 23 жұлдызында оқу ордасының ардагер ұстаздары мен басшылығы, сондай-ақ, ел намысын айтулы халықаралық жарыстарда абыроймен қорғаған Ермахан Ыбырайым, Майя Манеза секілді Олимпиада чемпиондарының қолынан өтіп, Қыздар университеті қалашығын толық шарлап, бас оқу ғимаратына жеткізілген болатын. Осы күнге дейін қара шаңырақтың қабырғасында сақталып келген мерейтойлық алау – Қыздар университеті 70 жылдық мерейтойының тұсаукесерлік символы ретінде ерекше мәртебеге ие болған еді.
Фильмнің салтанатты қойылымынан соң Қыздар университетінің ректоры Динар Нөкетаева бас ғимаратта сақталған алаудың тамызығымен сахна төріндегі әсем гүлдермен көмкерілген үлкен ошақтың отын тұтатты. Бұл әйел жанының, қыз-ғұмырдың табиғатынан хабар беретін өзіндік мазмұны кемел жарасым мен ұрпақ жалғастығы іспетті жоғары оқу ғимаратының табалдырығын жаңа аттаған студенттердің бойына ерекше жалынымен әсер етті.
Жиылған көпшілік алдында сөз бастаған Динар Нөкетаева: «Қыздар университеті – қаракөз қыздарға білім мен дәстүрлі тәрбиені қатар беріп отырған парасат мектебі. Осы мерзім ішінде киелі оқу орны 50 мыңнан астам мамандар дайындап, мектеп мұғалімінен бастап қоғам қайраткеріне дейін танымал түлектерін тәрбиелеп шығарды. Бұл білім ұясынан ұшқан әрбір түлек қоғамда өз орнын таба білетін білікті де кәсіби маман деп зор сеніммен айта аламын», – деп сапқа жаңа қосылған шәкірттерді «Мен – Қыздар университетінің студентімін!» деген атқа лайық болуға шақырды.
Қиялдарын қанаттарына байлап, армандарын арқалап келген бірінші курс студенттеріне игі тілегін білдірген оқу орнының басшысы білім кілтін І курс студенті Ақсәуле Амантаеваға табыс етті. Ал, студенттік билет Досбол Айдаға табысталса, сынақ кітапшасы Көкен Ләззатқа тапсырылды. Кеш барысында сонымен қатар, 1 курс студенттерінің ант қабылдау рәсімі болып өтті.
Салтанатты жиын соңы концерттік бағдарламаға ұласып, қазіргі таңда өз өнерлерімен танымал болып келе жатқан «Айгүл», «Ұлар» ансамбльдері, «Томирис» би ансамблі, 85 әншіден құралған университеттің хор ұжымы мен 50 өнерпаздан тұратын ұлт-аспаптар оркестрінің шығармаларымен өріліп, қазақ эстрадасы жұлдыздарының қатысуымен өнер кешіне ұласты.
Қанат ЕСКЕНДІР,
«Егемен Қазақстан».
АЛМАТЫ.
