Мемлекеттік сатып алу жүйесінде жең ұшынан жалғасқан түрлі заңсыздықтардың тыйылмай отырғаны жасырын емес. Үкіметтің кеңейтілген мәжілісінде Елбасы осы мәселеге айрықша назар аударып, билік орындарының тендерлерде «бөгде» жеткізушілердің қатысуына мүмкіндік бермейтін шарттар белгілеп, өз «адамдарын» өткізіп жіберетін келеңсіздіктерді қатты сынға алған болатын. Біз төменде бұратартушылықпен ұйымдастырылған мемлекеттік сатып алу арқылы кәсіпкерді нәпақасынан айырып, тентіретіп жібере жаздаған мемлекеттік қызметкерлердің іс-әрекеттері жайлы әңгімелемекпіз.
Мемлекеттік сатып алу жүйесінде жең ұшынан жалғасқан түрлі заңсыздықтардың тыйылмай отырғаны жасырын емес. Үкіметтің кеңейтілген мәжілісінде Елбасы осы мәселеге айрықша назар аударып, билік орындарының тендерлерде «бөгде» жеткізушілердің қатысуына мүмкіндік бермейтін шарттар белгілеп, өз «адамдарын» өткізіп жіберетін келеңсіздіктерді қатты сынға алған болатын. Біз төменде бұратартушылықпен ұйымдастырылған мемлекеттік сатып алу арқылы кәсіпкерді нәпақасынан айырып, тентіретіп жібере жаздаған мемлекеттік қызметкерлердің іс-әрекеттері жайлы әңгімелемекпіз.
«Нұр Отан» партиясы облыстық филиалының төрағасы, аймақ басшысы Самат Ескендіровтің қоғамдық қабылдауына арыздана келгендердің бірі «Петропавл-Лифт» ЖШС-нің директоры Сергей Царьков болды. Ол өз сөзінде жеке кәсібін дамытуда қолдан жасалған кедергілерге кездесіп отырғанын айта келіп, араша сұрады. Шенеуніктердің тендерді көпекөрінеу өзгеге жығып берген қиянатына шыдай алмай, әділдік іздеп келгенін жасырмады. Самат Сапарбекұлы жәбірленушінің шағымын мұқият тыңдап алғаннан кейін мәселенің мән-жайын егжей-тегжейлі анықтауды Петропавл қаласының әкімі Төлеген Зәкірияновқа тапсырды. Қала әкімі іле-шала осы салаға жауапты басшыларды қатыстыра отырып лифт жөндеу жұмыстарымен айналысып жүрген мекеме өкілдерімен кездесу өткізді. Онда 15 жылдан бері лифт жөндеумен шұғылданатын «Петропавл-Лифт» серіктестігінің биыл бірде-бір тапсырма алмағаны мәлім болды. Керісінше, сырттан киліккен «Техносиб» ЖШС «Тұрғын үй-коммуналдық шаруашылығын жаңғырту» бағдарламасы шеңберінде тендерді ұтып ала берген. Оның көлденең көк аттыдай жолдан қосылған іс-әрекетінің арғы жағында заңнама талаптарының өрескел бұзылғанын аңғару қиын емес еді. Сөйтсе, тұрғын үй инспекциясының өкілдерін шайтан азғырған болу керек, қос тараптың тендерге қатысу қарымы мен мүмкіндіктерін жан-жақты таразылап, әділдікпен шешудің орнына тура жолдан тайып кеткен. Тіпті, нарық айдынында мол тәжірибесі бар мекеме басшылығын жиындар мен басқосуларға шақыруды қажет деп таппағанға ұқсайды. Көпқабатты үйлердің тұрғындарын өздері бопсалап отырған мекемені таңдауға үгіттеген көрінеді. Осылайша, бюрократтық өзімбілемділіктің шылбырына оратылып, жеке-дара шешім қабылдаудың салдарынан қарсы тарапты жеңімпаз етіп шығарған.
«Тұрғын үй инспекциясы» мекемесінің заңгері Жанар Есетова өз әрекеттерін ақтамақ болып қанша жерден жанталасса да, қызметтен босату ұйғарылды. Тұрғын үй-коммуналдық шаруашылығы, жолаушылар көлігі және автомобиль жолдары бөлімінің жетекшісі Александр Чернов сөгіс алды.
Бұл мысал заң талаптарын белден басуға үйренген өзге лауазымды тұлғаларға сабақ болса игі.
Өмір ЕСҚАЛИ,
«Егемен Қазақстан».
Солтүстік Қазақстан облысы.
