Ықтималдыны ықтырудың жолы бар

Мәселен, пандемия күшіне енген мезгілде Қарағанды облысында 10 376 адам індеттің инфекциясын жұқ­тырған екен. Өкінішке қарай, осы ке­селдің кесірінен 279 науқас өмірден өтіп кетті. Ал карантиндік шектеу ша­раларынан экономикамызға келген шығынды ойласаң, төбе құйқаң шымырлайды.

Коронавирустың болу ықтимал­дығы тым жоғары екінші толқынына тойтарыс беру үшін облыста қазіргі уақытта қызу даярлық жүріп жатыр. Мысалы, 19 қазаннан бастап Қарағанды облысы бойынша 8 сани­тарлық бекет қойылмақ. Бұл турасында жергілікті Saryarqa телеарнасында өткен брифингте облыстық Тауарлар мен көрсетілетін қызметтердің сапасы мен қауіпсіздігін бақылау департаменті басшысының міндетін атқарушы Юрий Залыгин мәлімдеді.

Мұндай қадамға баруға көрші об­лыстардағы жаман тұмау жұқ­тыр­­­ғандар санының өсіп бара жат­­­қаны түрткі бол­ған екен. Сол се­беп­ті, енді облыстың Жез­­қазған, Прио­зерск қалалары мен Ұлы­тау, Нұра, Осакаров, Бұқар жырау және Қарқаралы аудандарының кіре­берісіне санитарлық бекет қою жөнін­де шешім қабылданған. Бұл жерлерде полиция мен медициналық қызметкерлер жүргізушілер мен жо­лау­шылардың денсаулық жағ­дайын тексеріп, күні-түні кезекшілік ететін болады. Бұған қоса, қалаларда көпқабатты тұрғын үйлердің кіре­беріс­тері, лифтілер мен паркингтер тәулігіне кем дегенде екі мәрте про­­­филактикалық дезинфекциялаудан және ылғалды тазалаудан өткізіледі. Ба­лалар мен аула алаңдары да күн са­йын дезинфекцияланады. Жасы 65-тен асқан егде адамдарға қозғалысты шектеу ұсынылады. Штатында 30-дан астам ада­мы бар мемлекеттік кә­сіпорындар мен ұйымдарда қыз­метшілердің 50%-ы қашықтан жұмыс істеу форматына көшірілуі тиіс. Шетелге шығатын туристермен ақпараттық жұмысты күшейту талап етіледі. 50 адамнан астам отыратын орны бар сауда-ойын-сауық ор­талықтарында, сауда үйлерінде, желілік дүкендерде, қоғамдық тамақ­тану орындарында бейнекамералар орнату ұсынылған. Мұндай қа­дам ереже бұзушылықтарды нақты уақыт режімінде тіркеу үшін керек. Сондай-ақ өнеркәсіптік кәсіп­орындарда, автовокзалдар мен авто­бекеттерде ста­ционарлық тепловизорлар мен ақылды бейнебақылау жүйелерін орнату талап етіледі. Жо­лаушылар көлігіне жүктемені төмендету мақсатында кә­сіпорындар мен ұйымдардың са­раланған жұмыс кестесі бойынша мә­селе шешілетін болады. Бұдан бөлек, өнеркәсіптік кәсіпорындардың басшылары өз қызметкерлерін жұмысқа және үй­ге жеткізуді ұйымдастыруы керек. Карантин тәртібі осылайша қатаң­да­ған кезде еріктілер зейнеткерлер мен мүмкіндігі шектеулі жандарға көмек көрсету жұмыстарын жандандырады. Маскалық режімнің, сани­тарлық-дезинфекциялық талап­тардың сақта­луын бақылау күшейеді.

Брифинг барысында облыстағы бас санитарлық дәрігердің міндетін атқарушы ойын-сауық, спорттық, отбасылық, еске алу, салтанатты және басқа да бұқаралық іс-шараларды өткізуге тыйым салынғанын тағы бір мәрте ескертті. Ал караоке, бильярд, компьютерлік клубтар, түнгі клубтар, боулинг орталықтары сияқты ойын-сауық мекемелерінің, сонымен қатар жабық үй-жайлардағы балалар ойын алаңдары мен аттракциондарының, батуттардың, жабық ғимараттағы кино­театрлардың, букмекерлік кең­се­лердің жұмыс істеуіне әлі де рұқ­сат етілмеген. Ю.Залыгин өңір тұрғын­дарын санитарлық талаптарды қатаң сақтауға шақырды.

– Вирус әлі де қауіпті. Үйден қажет болмаған жағдайда шықпаңыздар, көпшілік жиналатын жерден аулақ болыңыздар, әлеуметтік қашықтық пен маска режімін сақтаңыздар, – деді ол.

Ал Қарағанды облыстық денсау­лық сақтау басқармасының басшысы Ержан Нұрлыбаев коронавирустың болуы мүмкін екінші толқынына деген өңірдегі даярлықтың қалай өрбіп жатқанынан толық мәлімет берді.

– Облыста коронавирус инфек­ция­сының жаңа толқынына қарсы күрес даярлығы кең ауқымда жүр­гізі­луде. Мысалы, Жезқазған қала­сында жаңадан салынған 200 төсек­тік жұқпалы аурулар ауруханасы науқастарды қабылдауға дайындалуда. Ол модульдік тәсілмен салынған және заманауи медициналық жабдық­тармен қамтамасыз етілген. Қараша айына қарай Абай, Балқаш, Теміртау және Шахтинск қалаларында жұқ­палы аурулар ауруханаларын қайта құру және жөндеу аяқталады, – деді облыстың бас дәрігері.

Қазіргі уақытта облыс бойынша 160 науқас ем-дом алып жатыр. Күн сайын 5-6 адамнан жаман тұмаудың белгісі табылады. COVID-19 науқастарына арналған төсек­тік қор әзірге бар-жоғы 4%-ға ғана толыққан көрінеді. Бүгінде өңірдегі ауруханаларды заманауи медициналық техникамен жабдықтау жалғасуда. Атап айтқанда, 223 ӨЖЖ, 2400 оттегі концентраторы, 2600 пуль­соксиметр, 40 цифрлық рентген аппараты сатып алынған. Сондай-ақ медициналық газдарды берудің орталықтандырылған жүйелері орнатылады. Мобильді бригадалар қосымша көліктермен қамтамасыз етілген. Ком­пьютерлік томографтар паркі кү­шей­тілуде. ПТР-зертханалар желісі кеңеюде, оның қуаты тәулігіне 10 мың тест­ке дейін өсетін көрінеді.

Е.Нұрлыбаев егде адамдар то­бы үшін вирустық инфекцияның мау­сым­дық көтерілуі кезеңінде емха­наға барудың қажеті болмайтындай жағдай жасаудың амалдары қа­растырылатынын айтты.

– Қарт адамдарға медициналық қызметтер­дің көпшілігі үйде көрсеті­ле­тін болады. Диспансерлік есепте тұр­ған барлық пациенттер қаңтарды қос­қандағы алдағы үш айға қажетті дәрі-дәрмек қорын алады, – деді ол.

Сонымен бірге облыстың бас дәрі­гері тұмау мен пневмококк инфекциясына қарсы вакциналау науқаны аясында 200 мыңға жуық адамның тегін екпе алатынын жеткізді.

Бұдан сәл бұрын облыс әкімі Жеңіс Қасымбек аппарат жиындарының бірін­­де коронавирустың келесі тол­қынына қарсы даярлықтың жай-жапсарын тал­қылай келіп: «Мере­келер, тойлар, мерей­той­лар тоса тұрады. Туыстар мен жақындары­мыздың өмірі мен ден­сау­лығы әлде­қайда маңыздырақ», деген болатын.

Ресми деректерге сенсек, об­лыс­та коронавирустың уытын той­таруға қажетті дәрі-дәрмектің жет­кілікті қоры жасалған сыңайлы. Медициналық мекемелер мен шипагерлер қауымы төнген қауіпті бес қаруы түгел сай қарсы алуға дайын дегенді де жиі естиміз. Олай болса, ендігі жерде жаман тұмаудың болу ықтималдығы тым жоғары деп жүр­ген екінші толқынын ықтырудың бір жолы көп жағдайда тұрғындардың «Сақтансаң – сақтаймын» деген қағи­датты терең ұғынған санасы мен түсіні­гіне байланысты болмақ.

Қарағанды облысы