Анастасияның еріктілер жобасы жануарларды қорғау саласына, яғни Талдықорған қаласындағы бақылаусыз қалған жануарларды зарарсыздандыруға бағытталған.
Еріктінің айтуынша, қаңғыбас жануарлар қалада жиі кездеседі және тұрғындарға бірқатар қиындық тудыруда. Анастасия жеке зерттеу жүргізіп, қала аумағында жануарлар паналайтын орталық та жоқ екенін анықтады. Проблемалық мәселелер ашық күйінде қалып отыр: адамдарға шабуыл, ауру тарату, қаланың қоқыстармен ластануы және ең маңызды мәселе – оның көбеюі болып отыр.
– Адамгершілік тұрғысынан ұсталған жануарларды тек тіршілік ету фактісі үшін жою әдепке жатпайды. Шынында да, бұл мәселеге көбіне адамдар өздері кінәлі. Өйткені өздері қолға үйреткен жануарлардан бас тартады. Сондықтан зарарсыздандыру үйсіз жануарларға қатысты ең ізгілікті әдістердің бірі болып қала береді, – деді Анастасия Кормушина.
Әрқашан көмек көрсету Анастасияның ұзақмерзімді дәстүріне айналған. Ол Назарбаев зияткерлік мектебінің қабырғасында қамқорсыз қалған жануарларды тамақтандыруға бағытталған «Үміт панасы» жобасын жасады. Қазіргі уақытта мектеп белсенділері «Zooclub» жануарлар құқығын қорғаушылар қоғамдық бірлестігімен ынтымақтасып, үйсіз жануарларға ие табуға, тамақтандыруға, стендтер салуға, күтім жасауға көмектеседі. Қазір Анастасия зерттеуін жалғастыру үстінде.
– Менің зарарсыздандыру жобам басталды. Бүгінге дейін жеті қаңғыбас итті емдедік. Операциядан кейін жануарларға қамқорлық жасаймыз, оның көпшілігі жаңа иелерін тапты. Осындай кішкентай, бірақ сенімді қадамдармен біз қоғамның назарын жануарлар проблемасына аударамыз деп үміттенемін, – дейді зияткерлік мектептің оқушысы.
ТАЛДЫҚОРҒАН
