Бірінші мәселе бойынша облыстық жұмылдыру дайындығы басқармасының басшысы Медет Усаин хабарлама жасады.
Жалпы алдағы 2020-2021 жылдардағы ықтимал су тасқынына дайындық шаралары бойынша өзен бойы қорғаныс бөгеттерінің тұсы қауіпті 56 су басу аймақтарына бөлініп, оған 122 жауапты мекеме бекітілген. Оларда 1491 адам, 432 арнайы техника бар.
Қазіргі таңда облыс бойынша су тасқынына қарсы жұмыстарға пайдаланылатын материалдық-техникалық қорда 76,7 тонна жанар-жағар май қоры және 99 540 дана қап бар. Сондай-ақ, 27 750 бау қамыс, 5 600 дана пашын және 6 552 қарабура мен т.б. қажетті материалдар қорлары жасақталған.
Биыл су тасқынының алдын алуға 643,5 млн. теңге қаржы қаралды. Оның ішінде қорғаныс бөгеттерін нығайту, мұз жару жұмыстары мен қап сатып алу, тікұшақ қызметін пайдалану қарастырылған.
2020 жылға жалпы ұзындығы 70,5 шақырымды құрайтын өзен бойындағы қорғаныс бөгеттерінің 11 учаскесінде жөндеу, арнаны қазу жұмыстары жүргізіледі деп жоспарланған.
"Енді 2 ай шамасында өзен арнасында мұз қата бастайды. Облыстық жұмылдыру дайындығы басқармасына осы мақсатта бөлінген қаржының мерзімінде игерілуін және жұмыстың сапалы атқарылуын қатаң бақылауға алуды тапсырамын. Шұғыл түрде Қармақшы ауданы Абыла елді мекені тұсындағы Тойымбет каналына 2 көзді және Жаңақорған ауданындағы Өзгент көліне 1 көзді су тоспаларын салу қажет. Қазалы ауданының Тасарық, Қызылқұм елді мекенін су басудан қорғау мақсатында Қуаңдария каналына 3 көзді су тоспасын салу жұмыстарының жоба сметалық құжаттары әзірленіп, құрылысына қаржы бөлуге бюджеттік өтінім жолдансын", - деді облыс әкімі.
Сонымен қатар, тиісті сала басшыларына су басу аймақтарына жақын аумақтарға қажетті жұмыстарды ұйымдастыруды және Шардара су қоймасынан күз-көктем айларында Сырдария өзенінің төменгі ағысына түсірілетін су көлемінің бекітілген кестеге сәйкес босатылуына үнемі бақылау жасауды жүктеді.
Облыс аумағындағы эпизоотиялық ахуал туралы облыстық ветеринария басқармасының басшысы Ерсұлтан Әпетов баяндады.
Үстіміздегі жылы облыс көлемінде ауыл шаруашылығы жануарлары арасында ауру ошақтарын болдырмау, алдын алу, эпизоотиялық тұрақтылықты сақтау мақсатында аса қауіпті 14 түрлі жұқпалы ауруларға республикалық бюджет есебінен қаралған 5542,4 мың доза ветеринариялық препарат жеткізілді.
Облыс бойынша жоғары патогенді құс тұмауы ауруын алдын алу мақсатында ауруға қарсы 96,8 мың доза ветеринариялық препараттар жеткізіліп, үй құстарына алдын ала вакцина егілді.
Аймақ басшысы жоғары патогенді құс тұмауы ауруының алдын алу, болдырмау мақсатында тұрғылықты халық арасында тиісті түсіндірме жұмыстарын тұрақты түрде жүргізу қажет екенін ескертіп, облыс көлемінде аса қауіпті жұқпалы ауруларды болдырмау мақсатында ветеринариялық іс-шаралардың уақытылы жүргізілуіне бақылауды күшейтуді жүктеді.
Күн тәртібіндегі үшінші мәселе туралы облыстық денсаулық сақтау басқармасының басшысы Сабит Пазылов пен облыстық бас мемлекеттік санитариялық дәрігер Әлия Әбдіқайымова баяндама жасады.
Бүгінгі күнге, коронавирус инфекциясы бойынша аймағымыздағы эпидемиологиялық жағдай тұрақталды. Облыста 210 инфекциялық төсек орын бар. 18 науқас стационарлық режимде, 1 науқас жансақтау бөлімінде ем алуда. Эпид маусым басталғалы іс-шараларға тартылған барлық 13 380 қызметкерге 2 573,9 млн теңге төленді.
Медициналық құралдармен жабдықталу 10 айдың қорытындысымен 88,5% құрады. Инфекциялық стационарлардың реанимация бөлімінде бұл көрсеткіш 75%-дан 85,06%-ға дейін жоғарылады.
Қазіргі таңда облысымызда 244 ИВЛ аппараттары жұмыс жасауда. Одан бөлек, өңіріміздегі медициналық ұйымдарға гуманитарлық көмек арқылы 658 оттегі концентраторлары жеткізілді. Сонымен қатар, облыста 518 оттегімен қамтамасыз етілген төсек орындар дайын.
Облыста 24 мониторингтік топ жұмыс істейді. Барлық аудандар мен облыс орталықтарында тұрақты түрде мониторинг жүргізілуде. Рейдтік тексерумен қамтылған объектілер саны - 2942. Кезең-кезеңмен іске қосылған объектілерге жүргізілген мониторинг барысында 631 заң бұзушылық анықталып, айыппұлдар салынды.
Бүгінгі күні 4 зертхана жұмыс жасап жатыр, қажеттілікке байланысты қосымша 4 зертхана іске қосылуға дайын.
"Маусым-шілде айларындағы жағдай қайталанбас үшін тиісті жұмыстарды уақытылы жүргізу қажет. Отбасылық іс-шаралар жасап жатқан тұрғындарға, кафе, мейрамхана иелеріне қаншама ескерту берілсе де, айыппұл салынса да жұмыстарын тоқтатпай отыр. Тіпті мемлекеттік мекемелердегі сақтық шаралары қызметкерлер арасында толық сақталмайды. Талап ортақ, карантин шараларының тиімді іске асуына бәріміз жауаптымыз", - деді облыс әкімі.
Мұнымен қоса, жоспарланған төсек орындардың дайындығын және науқастарды оттегімен қамтамасыз ету бойынша тиісті жұмыстарды жүргізу, бастапқы медициналық-санитарлық және стационарлық көмек нысандарының қажетті ресурстармен толығымен жабдықталуын қамтамасыз ету керектігін атап өтті.
