Бұл жұмысты Президент жанындағы Мемлекеттік басқару академиясы өз мойнына алды. Мемлекеттік қызмет істері агенттігінің төрағасы Анар Жаилғанова Академияда «А» корпусының мемлекеттік қызметшілеріне арналған қайта даярлау курстарының ашылу салтанатындағы алғы сөзінде бұл қадамның кәсіби, бәсекеге қабілетті басшыларды даярлауға бағытталғанын атап өтті. «Аталған курс Қазақстанның Тұңғыш Президенті – Елбасы Н.Назарбаевтың қоғам қажеттіліктеріне баса назар аударатын, заманауи мемлекеттік аппараттың талаптарына жауап беретін басшыларды даярлау туралы тапсырмасын іске асыру мақсатында жүргізіліп жатыр», деді А.Жаилғанова. Сондай-ақ ведомство басшысы Н.Ә.Назарбаевтың «саяси көшбасшылар саясатты қалыптастырады, кәсіби мемлекеттік қызметкерлер оның орындалуын қамтамасыз етеді» деген сөзін баса айтты.
Курсты Мемлекеттік басқару академиясы мен Назарбаев Университеті бірлесе ұйымдастырып отырғанын айта кеткен жөн.
«А» корпусы – бұл саяси басшылық пен орындаушылық буын арасындағы өзара байланысты қамтамасыз етуге арналған кәсіби басқарушылық буын. Бағдарламаға мемлекеттік басқару, кадр саясаты, шешім қабылдау жүйесі тәсілдерін және басқа да бірқатар басым мәселелерді өзгерту бойынша алдына маңызды міндеттер қойылған тәжірибелі, қалыптасқан ірі құрылымдардың басшылары қатысады.
Стратегиялық көшбасшылық, өзгерістерді басқару және тиімді коммуникациялар сияқты дағдылар Президенттің Жолдауында айтылған міндеттерді жедел және сапалы шешуге көмектеспек. Сондай-ақ мамандардың біліктілігін арттыру елдегі экономикалық өсу қарқынын қалпына келтіру, халықтың өмір сүру сапасын жақсарту мен мемлекеттік органдар қызметінің тиімділігін түбегейлі арттыру жұмысында да өте өзекті болып отыр.
«Мемлекеттік басқару мен қоғамдық дамудағы жүйелі өзгерістердің қазіргі заманғы трендтері мен жоғары қарқыны елдің стратегиялық міндеттерін тиімді шешу үшін инновациялық және инклюзивті ойлау қабілеті бар басшылардың жаңа буынын қалыптастыруды талап етеді», деп қорытындылады А.Жаилғанова.