Мониторинг нәтижесінде, 60-тан астам жатақханада түрлі кемшіліктер анықталды. Олардың арасында жиі кездесетіндері: санитарлық нормалардың сақталмауы, өрт қауіпсіздігі шараларының бұзылуы, жатақханалардағы бөлмелерде студенттердің шамадан тыс көп екендігі.
Jas Otan ЖҚ жетекшісі Елнұр Бейсенбаев атап өткендей, қазіргі жағдайда студенттердің онлайн форматта оқығанына қарамастан, жатақханаға қатысты проблемалар өзектілігін жойған жоқ.
«Арман қуып келген ауыл жастары үшін жатақхана – екінші үй. Сондықтан студенттердің қолайлы өмір сүруі үшін ең жақсы жағдай жасалуы керек. Студенттер үйінде тұратын проблемалары бар кез келген студент бізге хабарласа алады. Сондай-ақ студенттердің арасынан жас көшбасшыларды осы акцияға қатысуға шақырамын», деді Елнұр Бейсенбаев.
Тексерістің бірінші легі Шығыс Қазақстан, Солтүстік Қазақстан, Маңғыстау, Қызылорда, Павлодар, Атырау, Ақмола облыстарында өтті. Жылдың басында бастау алған мониторинг елдегі жатақхана жайынан толық ақпарат берді.
Мәселен, өткен жылы Ақтау қаласындағы Х.Өзбекғалиев атындағы политехникалық колледжінің №5 жатақханасында бірқатар кемшілік анықталып, ескерту берілген. Биылғы оқу жылында «Жол картасы» аясында аталған нысанда күрделі жөндеу жүргізіліп, жатақхананың материалдық қоры жаңартылды. Жөнделген жатақханада қазір вай-фай, бақылау камералары, кір жуатын бөлмелер, оқу және демалыс бөлмелері бар. Сондай-ақ мемлекет-жекеменшік әріптестік аясында жергілікті кәсіпкер Шамшадин Гусейнов бос қалған жатақхананы жөндеп, студенттерге жаңа 180 орын ұсынды. Нысан иесі жақын арада жатақхана алдында студенттерге арналған спорт залын салуды жоспарлап отыр. Бірақ жер учаскесінің құжаттарымен мәселе туындап тұрған көрінеді. Нысан иесі жауапты адамдардан бұл мәселені шешуге жәрдем сұрауда.
Жатақханаларға мониторинг еліміздің өзге де өңірлерінде жалғасын тауып, қазан айынын соңына дейін созылады.
