Махаббат сағызы

 

Сағыз жайлы сөз қаузай қалсақ, ерте­дегі «Ералаштан» естіген әйгілі әңгі­ме ойымызға оралады. Бала тілі бал ғой, шіркін! «Nike не Adidas-тың киімі болмаса, құр сағызға Отанымды сата алмаймын» демеуші ме еді? Бал­дырғанды тәттімен алдап, шекарадан өтуге оқталған қарақшы осылайша өз қу­лығына өзі түсетін. Шынында, жеу­ге жарамсыз тәтті ойын баласының ал­­данышы ғана. Бірақ онда қаншама ес­телік бар. Сол заманда сағызға деген сұраныс сұрапыл еді. Таңдайы кеп­кенше таңнан кешке дейін шайнап, үлпіл­детіп үрлеп, шар жасап ойнайтын кіш­кентай бұзықтардың әрекеті әлі де жадымызда. Алақанына жасырып, қай қолында екенін тапқанша сұлуға сыр алдырмайтын бозбаланың жүрек лүпілін айтсаңызшы!?

Жүрек лүпілі дегеннен шығады, «Love is...» сүйкімді комикстерінде үл­кен махаббат оқиғасы бұғынып жатыр. Қа­ғаздағы әсерлі бейнелер суретшінің сүйген жарына арналғанын біреу білсе, біреу білмес. Сүйіспеншілік, адалдық және жоғалту тақырыбындағы қысқа мәтінді суреттер сериясы. Ғашықтық хаттарға ұласқан мөп-мөлдір махаббат миниатюралары.

«Love is...» бұл Жаңа Зеландия елі­нің тумасы, анимация суретшісі Ким Касалидің туындысы. Ол бала күнінен саяхаттағанды ерекше жақсы көрген екен. 19-ға толған шағында арманшыл бойжеткен ақыры үйінен ұзап, жиһан­герлік жолға түседі. Жер шарын толық аралауды мақсат еткен қиялшыл қыз ара­ға алты жыл салып, Калифорнияға тұрақ­тайды. Тағдырға жазғаны шығар, сол әсем шаһардан италиялық азамат Роберто Касалимен кездеседі. Амери­каға жаңа қоныс аударған суретші дү­ние­ні шыр айналып таппаған бақытын сол қаладан жолықтырыпты. Қызығы, жігітті бір көргеннен ұнатып қалады. Деген­мен табиғатынан биязы бойжет­кен ғашықтық ниетін сол сәтте білдірудің ретін таппайды-мыс. Міне, бұл рай алапат сезімнің арбауына түскен аруға асқақ шабыт сыйлап, өмірге керемет комикстерді әкелуіне септігін тигі­зеді. Ақынның жұбанышы өлең болса, суретшінің көңілге сүйеніші картина емес пе? Ендеше, сұлудың сағыныш хаттары жүрек толқытпасына кім кепіл!?

Сонымен Ким шағын салфеткаларға топ-томпақ қыз бен жігіттің қарым-қатынасын бейнелей бастайды. Ешқан­дай бояусыз кескіндемелер тек екі кейіп­­­кердің өмірінен сыр шертіп, әр түр­­лі эмоциялармен әдіптеледі. «Мен өзімнің балаң сезімімді білдіру үшін ықшамдалған эскиздер жасадым. Бұл менің сезімімнің күшін сипаттайтын эмоциялардың күнделігін жүргізу сияқ­ты болды. Алдымен қызға айналған тамшыны салдым. Ол, әрине мен! Ондағы қыз менің ғажайып сезімімді бастан өткерген адам. Артынан тағы бір тамшы салдым. Ол – осы сезімге себеп болған бала», дейді автор естелігінде.

«Ғашықтың тілі – тілсіз тіл» дегендей Роберто суретші сұлуға сөз салуға бата ал­­май, көңілін құпия ұстауға тырысады. Алайда Ким жолдаған комикстерді көр­генде кездесуге асығыпты. Махаббат өртіне күйген екі жас осылайша отау құрады. Екеуі ырымдап Кимнің ата-анасы үйленген шіркеуде некелеседі. Жас қалыңдық той көйлегімен қоса, басына түймедақтан тәж жасап киіпті. Кейін бұл сәт оның комикстерінде де көрініс тапқан.

Роберто әйелінің өне­ріне таң-тама­ша болып, шығар­машылығын насихат­тауға кіріседі. Сөйтіп 1970 жы­лы 5 қаң­­­­­тар­да тұңғыш рет «Los Angeles Ti­mes»­­­ га­зетінде суреттер жарияланады.­ Ко­­миксте бала қызды «Ким» деп ата­са, қыз құмға «Р» әріпін бейнелеген. Оны­­сы Роберто есімінің бірінші қаріпін мең­­зегені.

Иә, махаббат комикс­терінің бірден танымал бол­ғаны соншалық, ер­лі-зайыптылар Minikim кор­по­рациясын құрады. Онда Ро­берто менеджер болып қыз­мет атқарады. Суреттер тек жур­налдарда ғана емес, күнтізбелерде, плакат­тарда, кружкаларда, футболкаларда басыла бастайды. Тіпті Ким Касалидің жылдық табысы 5 миллион­ фунт стерлингті құраған. Ал «Love is...»­ өнімі әлемнің 50 еліне сапар шегіп, бренд­ке айналады. Махаббаттың құдірет кү­ші әлдилесе, дәл осылай әлдилесін адам­затты.

Ким өзін ешқашан нағыз суретшімін деп санамаған. 1981 жылы берген сұхбатында: «Егер менің таңдауым болса, романтикалық әндердің авторы болар едім. Махаббат әндері маған қатты әсер етеді. Әттеген-айы, әдемі жаза алмаймын, сондықтан өз сезімімді білдірудің басқа әдісін таңдауым керек болды», дейді ағынан жарылып.

Махаббат дастанының кейіпкерлері қарым-қатынастың әр түрлі кезеңдерінен өтеді. Танысудан бастап ерлі-зайып­ты болғанға дейінгі мерейлі мезет­тер­дің барлығы ұштасқан. Ол – ол ма, кейіп­кер­лер­дің бірінің қайтыс болуына дейін көр­сетілген. Оған себеп – 1975 жылы Робертоға дәрігерлер тексерісінен кейін, «қатерлі ісік» диагнозы қойылуы. Ойда жоқта келген індет Кимге үлкен соққы болып тиеді. «Әкем менің жас кезімде қайтыс болды, сондықтан Роберто тұрмысқа шығуымды өтінгенде: « Не істесең де, мен үшін ұзақ өмір сүр­ші» дедім. Ол күліп, тырысып көре­мін деп уәде берді», дейді суретші қолжаз­ба­сында.

Өкінішке қарай Роберто уәдесінде тұра алмайды. Кимнің бақыты ұзаққа созыл­мады. Ол сүйіктісіне көбірек уа­қыт бөлу үшін комикстермен жұмыс іс­теуді тоқтата тұруға мәжбүр болады. Бірақ суретші жарымен табыстырған комикс­терден бас тартуды мүлдем ойлаған жоқ. Берекелі ісін ағылшын мультипликаторы Билл Асприге әрі қарай жалғастыруды өтінеді. Биллдің қылқаламынан туған түрлі-түсті комикстерді кейін Ресей, Түр­кия және Украина суретшілері іліп әкетті.

Англияға қоныс аударған соң Робер­то Касали 31 жасында дүниеден озады. Ал комикстерде тек қыз бен екеуі бірге отыр­ған тұғыр ғана қалады. Оқырмандар мұны жақсы түсінген. Орны толмас қайғының артынан қуаныш үйіліп, Ким көп ұзамай сәбилі болады. Британдық газеттер нәрестеге «Керемет нәресте» деп айдар тағып, мадақтама мақалалар жа­зады.

Күйеуінің қазасынан кейін Ким өнерден қол үзіп кеткен жоқ. Бар уа­қы­тын балаларының тәрбиесі мен шығар­машылығына арнады. Алайда ол да жаман ауруға душар болып, 55 жасында бақиға аттанады. Отбасылық бизнеске үлкен ұлы Стефано ие болады. Билл Аспри келісімшарт бойынша Кимнің қол­таңбасымен, «Love is...» хикаясын әрі қарай жалғастырады. Жылдар алмасып, бірте-бірте Ким мен Робертоның махаббат тарихы ұмытыла бастайды. Енді сегіз тілде сөйлеген комикстер жас ғашықтардың ізгі лебізіне ұласып, махаббат символына айналып шыға келеді.

1990 жылы «Love is...» сағызы Түр­кия мен Ресейде өндіріле бастады. Ондағы компаниялар Кимнің идеясын негізге алып, тәтті өнімді махаббат афо­ризмдеріне толы қорапқа қаптап, экспортқа шығарды. Қораптағы әртүр­лі комикстер қыз бен жігіттің жүрек сөзіндей әсерлі мөлтек мәтінге толы. Тауардың өтімділігін арттырып тұрған Ким негізін қалап кеткен сүйкімді ко­микс­тер екені кейіннен әлемге мәшһүр болды.

Міне, талай мәрте ро­ман­тикалық кеш^­тердің сәніне айналған сағыз­дың шығу та^­рихы осындай. Сіз де махаб­бат сағы­зын шайнаған бо­лар­сыз? Есіңізге түсіріп кө­­ріңізші?