Меморандумның мақсаты - экология саласында маманданған салалық журналистерді даярлау.
Меморандум тараптардың экожурналистерді даярлау мәселесінде ынтымақтастығын көздейді.
Тараптардың әрқайсысы өз құзыреті шеңберінде болашақ журналистердің кәсібилігін арттыруға жағдай жасауға ниетті.
Бұл ретте экология мәселелері қоғамда өте өзекті және кеңінен жария етілуде екендігін атап өткен жөн.
Тиісінше осы салада тиімді ақпараттық түсіндірме жұмыстарын жүргізуді қажет етеді.
Меморандум аясында бірқатар нақты іс-шаралар өткізілмек, оның ішінде білім беру бағдарламалары жетілдіріледі, студенттердің кәсіби практикалары мен тағылымдамалары ұйымдастырылады, салалық журналистердің пулдары құрылады.
Нәтижесінде медиа нарықты экология саласында материалдар іздеуге және мақалалар дайындауға маманданған білікті журналистермен қамтамасыз ету жоспарлануда.
Еске салсақ, қазіргі уақытта Министрлік салалық журналистерді даярлау бойынша жұмыс жүргізуде.
Бұдан бұрын медицина және дін салаларында маманданған журналистерді даярлау үшін Л.Н. Гумилев атындағы ЕҰУ-мен өзара түсіністік пен ынтымақтастық туралы 2 меморандумға қол қойылған болатын.
