Жерлестеріміздің арасынан алғашқы болып Дмитрий Попко кортқа шықты. Ол Молдованың өкілі Раду Алботпен кездесті. Әлемдік рейтингте қазақстандық теннисші 172 орында тұрса, қарсыласы 85 сатыға жайғасқан. Алботтың «Үлкен дуылға» санатындағы турнирлерде әбден ысылған сақа спортшы екенін айта кеткен жөн. 2018 жылы ол АҚШ-тың ашық біріншілігінің жұптық сайысында жартылай финалға дейін жеткен. Осындай мықтыға тап келген Попко өз жанкүйерлерін қуантуға барынша тырысқанымен, жеңіс молдовалық ойыншының еншісінде кетті. Есеп – 2:1 (6:4, 4:6, 6:4).
Ал өзге кездесулерде мынадай есептер тіркелді: Фернандо Вердаско (Испания) – Джеймс Дакворт (Аустралия) 2:0 (6:4, 7:6), Томми Пол (АҚШ) – Стефано Травалья (Италия) 2:0 (7:6, 6:3), Камерон Нори (Ұлыбритания) – Джордан Томпсон (Аустралия) 1:2 (7:5, 6:7, 2:6) және Фрэнсис Тиафо (АҚШ) – Корнентен Муто (Франция) 2:0 (6:3, 6:2).
