Оқиға • 30 Қазан, 2020

Бауырлас елдің басты байлығы

371 рет
көрсетілді
3 мин
оқу үшін

Зәу жүзінен төгілген азаттықтың алтын сәулесі түркі жұртымен тұтасып, Тұран даласының әрбір тасына мөрленгендей. Сол жұлдызды мөр қазанбұзарлығы жоқ халықтың қадіріне қазық болып қағылғанына, міне, 97 жыл. Бұл тамыры бір туысқан түрік халқының тауанды тұлғасы Ататүріктің жүрегіне тұмар болып тағылған арман еді. Ерлігінің ерен үлгісіндей ғасырлардан үзілмей жеткен елдігінің еншісі, өрлігінің белгісі. Оған Түркия Республика күніне орай ұйымдастырылған «Байрағы биік байтақ ел» атты жиында тағы бір рет көзіміз жетті.

Бауырлас елдің басты байлығы

 

Бұлай сөз салмақтауымыздың өз бағыт-бағдары бар. Неге десеңіз, Халық­аралық Түркі академиясы және Юнус Эмре атындағы түрік мәдени орта­лығы­ның қолдауымен өткен дөң­гелек үстелде ағайынға ақ лебізін ақ­тар­ған қоғам зиялы­ларының түрік жұрты­на деген ыстық ықыласының айрық­ша екенін байқадық. Алдымен қатысу­шыларға өз заманының заңғар перзенті Мұстафа Кемалға арнал­ған кітап көрмесі ұсынылып, төрінен төрт тарап нұрлы сөз күткен, көркіне күллі ел көз тіккен Түркия мемлекетінің ғасырға жуық ғұмырнамасынан сыр тартқан көр­кем­фильм көрсетілді.

Келелі кездесудің тізгінін ұстаған Халықаралық Түркі академиясының президенті Дархан Қыдырәлі жинал­ғандарды аталған мерекемен құттықтап, беташар сөзді Түркия Республикасының Қазақстандағы Төтенше және өкілетті елшісі Уфук Экиджиге ұсынды.

– Тәуелсіздіктен артық қымбат дүние жоқ. Түрік Республикасының қазіргі қол жеткен табыстары азаттық жолындағы азапты жылдардың жемісі. Түрік халқы бұл күнге оңай жете қойған жоқ. Ол жолда қаншама бауырымыздың қаны төгілді. Ұлт болып ұйысу мен мемлекет болып қалыптасудың небір кезеңдерінен өтті. Бақытымызға орай 1923 жылы 29 қазанда еркіндікке қол жалғап, сол уақыттағы жас республи­камыздың тұңғыш президенті болып маршал Мұстафа Кемал сайланды. Мемлекет пен халық алдындағы еңбегі үшін оған 1934 жылы 24 қарашада «Ататүрік» тегі берілді. Заңғар тұлғамыз Түркия территориясын талан-таражға түсіп, бодан болудан құтқарды. Соның арқасында егемендікпен еркін тыныстап келеміз, – дей келе елші, осы айтулы шараны ұйымдастырушыларға алғысын білдірді.

Одан кейін сөз кезегі Қазақстан халқы Ассамблеясы Төрағасының орынбасары – Қазақстан Президенті Әкімшілігі ҚХА Хатшылығының меңгерушісі  Жан­сейіт Түймебаевқа берілді. Екі тілде қатар сөйлеп, Түркияның азаттық жолындағы күресін баяндаған Жансейіт Қансейітұлы түбі бір қос елдің бауырластығы нығая беруін тіледі.

1

Жиынға сондай-ақ Сыртқы істер министрлігінің департамент директоры Ержан Мұқаш, Түркі кеңесі Ақсақалдары кеңесінің мүшесі Әділ Ахметов қатысып, сөз сөйледі.

Жиын барысында Юнус Эмре атын­дағы түрік мәдени орталығының білім алушылары Мұхаммедияр Анкабаев пен Бақдәулет Ташманов түрік тілінде арнау өлең оқып, арнайы алғыс хатпен марапатталды. 

Айта кету керек, осыдан ғасырға жуық уақыт бұрын Анадолыда ұлт көш­­­бас­­шысы Ататүрік бастаған шетел интер­­­венттерінің жаулауынан азат етуге бағыт­­талған ұлт-азаттық күрес жеңіспен аяқтал­ған еді. Содан ел конституциясына өз­герістер еніп, Түркия Республикасы өмірге келді. Дәстүр бойынша мерекелік шара­лар сол елдің бас қаласы Анкарадағы Ататүрік кесенесінен бастау алады. Осы ретте Қазақстан да бауырлас елдің ұлық мерекесін қастерлеп, жыл сайын қуаны­шына ортақтасып келеді.

 

Соңғы жаңалықтар

Су үнемдейтін қондырғы

Технология • Кеше