Халқына мол рухани байлық қалдырған жазушының мерейтойына орай «Зейнола Сәнік атындағы мәдениет қоры» игілікті іс-шаралар атқарып отыр. Атап айтқанда, қаламгердің ата қонысы Үржар ауданының Қабанбай ауылында аудан әкімдігінің қолдауымен «Зейнолла Сәнік атындағы әдебиет кабинеті» ашылды. 3 миллион теңгеге заманауи үлгіде жабдықталған арнайы кабинетке 60-қа тарта танымал ақын-жазушылардың кітаптары сыйға тартылды. Сонымен қатар Қабанбай ауылындағы екі мектептің әлеуметтік аз қамтылған ең үздік, талантты 7 оқушысына ынталандыру ретінде 50 000 теңгеден шәкіртақы берілді. Алдағы уақытта да мектептің талантты оқушыларына тұрақты түрде қолдау жасала бермек. Яғни оқушылар арасында олимпиада мен ғылыми жобалар байқауын өткізу және үздік мектеп түлегінің жоғары оқу орнында сұранысқа ие мамандық бойынша білім алуына көмектесу көзделген. Тағы бір атап өтерлігі, індет өршіген тұста мәдениет қоры Қабанбай ауылдық ауруханасына 3,5 миллион теңгеге 6 дана оттегі аппараты мен арнайы медициналық төсек алып берді. Сонымен қатар қор Тарбағатай аудандық ауруханасына да 3 оттегі аппаратын жеткізді.
Заманауи үлгідегі әдебиет кабинетінің ашылуына Қазақстан Жазушылар одағы басқарма төрағасының бірінші орынбасары, танымал ақын Ақберен Елгезек, Үржар ауданы әкімінің орынбасары Біржан Қадірұлы, аудандық ішкі саясат, білім бөлімнің мамандары, ауыл ақсақалдары, ақындар мен ұстаздар ақ батасын беріп, тілектестігін білдірді.
Ауылдың рухани өміріне қан жүгіртіп, әдебиет пен өнерді дамытуға үзбей үлес қосып келе жатқан мәдениет қорының тағылымды іс-шарасы Үржар аудандық мәдениет үйінде жалғасты. Аудандық мәдениет және тілдерді дамыту бөлімінің ұйымдастыруымен ақын Ақберен Елгезектің Алматы мен Нұр-Сұлтанда жоспарлап өтпей қалған «Болмаған балалық шақ» кітабының таныстырылымына арналған шағын әдеби кеш өтті. Ақынның өлеңдері оқылып, өлеңіне жазылған әндер шырқалып, оқырман көкейіндегі сұрақтарға автордың өзі жауап берді. Сондай-ақ талантты 3 өнерпазға қор атынан арнайы шәкіртақы берілді.
Қордың қолдауымен қос ақын Ақберен Елгезек пен Дәулеткерей Кәпұлының 100 кітабы Үржар кітапханаларына жол тартты.
Таяуда ғана «Зейнолла Сәнік атындағы мәдениет қорының» жүлдесі үшін астаналық БАҚ өкілдері арасында шағын футболдан мерейтойлық турнир өткізілген еді. Аталған спорттық шара 31 қазанда Алматыда жалғаспақ. Оған БАҚ өкілдері мен қатар ақын-жазушылар да қатысуға ниет білдіріп отыр.
Иісі қазаққа игілігі жететін жақсы істердің ұйытқысы болып келе жатқан «Зейнолла Сәнік атындағы мәдениет қоры» бұған дейін зерттеушілер мен қаламгерлердің кітабының шығуына қолдау жасады. Алакөлде ақындар айтысы, Алматыда оқушылар арасында «Ділмар» шешендік өнер байқауы, Оралда батыс аймақтық жыршы-термешілер фестивалін өткізуге демеушілік жасап ұйытқы болды. Алдағы уақытта да мәдениет қорының мәнді-мазмұнды шаралары жалғаса бермек.
