Тараз қаласының 85 жастағы тұрғыны Лидия Сидоренко өзі көлік жүргізген 61 жылдың ішінде бірде-бір рет те жол ережесін бұзбаған екен. Тәжірибелі жүргізуші ертеде «Москвич-восьмерка» және «Москвич-2140» көліктерін тізгіндеген болса, 1990 жылы оны «ВАЗ-2106» темір тұлпарына алмастырған. Ал «Волга» ГАЗ-24 машинасын 2011 жылдан бері әлі күнге дейін басқарып келеді. Ол жүргізуші куәлігін 1959 жылы сол кездегі Жамбыл қаласынан алыпты. Бір қызығы, ол бірақ ешбір көлік ұйымында жұмыс істемеген, ұзақ жылдар бойы облыс бойынша тұтынушылар одағында еңбек етіпті. Тәжірибелі жүргізуші, әсіресе жастарды жол қозғалысы ережелерін мүлтіксіз сақтауға, өзінен басқа адамдарды да қадірлеуге шақырады. «Сонда ғана тәртіп орнап, жол-көлік оқиғалары мен қайғылы оқиғалар аз болмақ», дейді ол.
Әулиеата жеріндегі ең тәртіпті жүргізушімен жуырда ғана Жамбыл облыстық Полиция департаментінің бастығы, генерал-майор Жанат Сүлейменов кездескен болатын. Кездесуде «Волга», «Москвич», «Жигули» сияқты жеті түрлі ретромашиналар қатарласып, бой түзеді. Олардың кейбірін Лидия Сидоренко жеке өзі басқарып, жас полицейлерге көлік басқару шеберлігін көрсеткен еді. Тіпті әрбір көліктің ерекшеліктері туралы да айтып берді. Бұл ретте өңірдің бас полицейі оған талай жыл бойы тәртіпке бағынып, жол ережесін бұзбағаны үшін алғыс айтып, Алғыс хат, гүл шоқтарын және бағалы сыйлық табыстады. Жасы сексеннің бел ортасына келсе де Лидия Сидоренко көлік жүргізуден шаршаған емес. Қайта Тараз көшелерінде көпшілікке үлгі көрсетіп жүр.
Жамбыл облысы
