«Ұрпақ next» қоғамдық қорының басшысы Гүлжанат Мұратбайдың айтуынша, Еуразия қоры үкіметтік емес ұйымдардың әлеуетін көтеру мақсатында арнайы грант бөлген. Онда Маңғыстаудың «Ұрпақ Next» қоғамдық қоры жеңімпаз атанды.
– Биыл қазан айынан басталған жоба 2021 жылдың сәуір айына дейін жүзеге асады. Жоба мүмкіндігі шектеулі әйелдерді жұмыспен қамтып және кәсіпкерлікпен айналысуға көмектеседі. Бұған 18 бен 45 жас аралығындағы өңірде тұратын мүмкіндігі шектеулі қыз-келіншектер мен ерекше бала тәрбиелеп отырған аналар қатыса алады, – деді Г.Мұратбай.
Жоба аясында мамандар мүмкіндігі шектеулі қыз-келіншектерге құрақ құрау, кондитер, визажист, SMM маманы бойынша онлайн курс өткізеді. Кейін курсқа қатысушылар өз кәсібін ашу, басқару, маркетинг, сату, жеке брендті қалыптастыру, әлеуметтік желілерді тиімді пайдалану, мемлекеттік бағдарламалар мен субсидия алу секілді тақырыптарды қамтыған бизнес курсынан өтеді.
Мәліметтер Маңғыстау облысында 27 481 мүмкіндігі шектеулі адам тұратынын көрсетеді. Оның 56%-ы еңбекке қабілетті саналады. Басты мақсат нәтижелі жұмыспен қамту бағыты болғандықтан, тұрғылықты жерде жұмысқа орналасуға немесе өз кәсібін ашуға аталған қоғамдық қор мүмкіндігінше ықпал етеді.
Жанашыр болып, бірін-бірі қолдап жүру – азаматтықтың, адамгершіліктің белгісі. Ал мүгедек жандарға көмек қолын созу жақсылықтың да жақсылығы болмақ.
Маңғыстау облысы
