Естеріңізге сала кетейік, «Шағын ауданның мәселесі шаш етектен» атты мақалада 19-шағын ауданда салынып жатқан бірнеше тұрғын үйдің сапасыздығы жөнінде мәселе көтерілді. Атап айтсақ І.Есенберлин 2/2, Көкжал Барақ 4, Əл-Фараби 38/2, Қазыбек би 46, Уəлиев 9/3 мекенжайларындағы көпқабатты үйлердің тұрғындары жаңа баспаналарының сапасыздығына шағымданып, бармаған жерлері, ашпаған есіктері қалмағанын айтқан болатын.
Осы мақаладан кейін редакциямызға келіп түскен хатқа қол қойған азаматтар «біршама өкпе-назымызды білдірмекпіз» дей келе: «Қаламыздың сол жағалауында орын тепкен 19-шағын аудан – Өскеменнің жаңа бөлігі, қанаттанып келе жатқан жас шағын аудан болып табылады. Жаңадан бой көтерген қалашық болғаннан кейін халықтың сыны да, көзі де, мақтауы мен даттауы да осы жақта. Жанашырлықтан гөрі бастамаға қолдау танытып, қолұшын беруден бұрын, тырнақ астынан кір іздеп, түймедей нәрсені түйедей қылатындар қарасы қоғамда аз емес» деп бастаған. Содан соң шағын ауданда атқарылған, атқарылып жатқан шаруаларды тізіп өтіп, «Біздің жайлы да сүйікті мекенімізге айналған 19-шағын ауданға тағылған айыпқа, орынсыз сынға түбегейлі келіспейміз» деп аяқтаған. Соңында осы ауданның бірнеше тұрғыны қолдарын қойып, мекенжайларын көрсетіпті. Тізімге көз жүгірте келе Есенберлин 6А мекенжайынан үш тұрғынның қолын байқадық. Проблемасыз үй қандай болады екен деп иелері қол қойған үш пәтердің есігін қақтық. Сөйтсек, үшеуі де пәтер жалдаушылар екен.
– Мен «квартирантпын». Баламен серуендеп жүрген едім. Екі қыз жүгіріп келіп ақ қағазға қол қойғызып алды. Не туралы екенін білмедім. Қолында он бәленбай бос қағаз болған. «Ешқандай шағымым жоқ деп қол қоя салыңызшы» деп өтінген соң қоя салғанмын, – дейді 22-пәтердің тұрғыны Г.Аққазина.
Сол сияқты 3-ші пәтердің тұрғыны да жалдап тұрып жатқандар. Оның үстіне олар ешқандай қағазға қол қоймаған. Тұрғындардың айтуынша, 8-ші пәтерді де жалдап тұрады екен. Тұрғындар демекші, дәл осы үйдің тұрғындарымен тілдестік. Проблемасы сол баяғы біз мақалада атап өткен үйлердікіндей. Терезе астынан жел үрлейді, қабырғасы қопсып жатыр, тағысын тағы.
– Үйдің сыртын қаптатамыз дегенбіз. Кіреберісін өзіміз ақша жинап жасаттық. Пандусты да жүгіріп жүріп өзім қойғыздым. Өйткені жолдасым 1-топтағы мүгедек, арбада отыр. Үйдің сапасын өзің көріп тұрсың, – деді Дәмеш Байдырахманова.
Иә, үйдің сапасы көрініп тұр.
Айтқандай, бізге келіп түскен хаттың мәтінін Мәдениет қайраткері, Өскемен қалалық ардагерлер кеңесі төрағасының орынбасары – Сағынбек Ақанов сканерлеп, әлеуметтік «Facebook» желісінде бөліскен еді. Пост авторымен хабарласқанымызда:
– Қолды волонтерлер жинады. Оларды кім ұйымдастырғанын білмеймін. Ал хатты ішкі саясатта алып қалған. Бірақ 19-шағын ауданда мәселенің бары рас. Бауырларымыз да үй алып, улап-шулағанын білеміз, – деді Сағынбек Ақанов.
Ардагерлер кеңесі төрағасының орынбасары желіге жариялаған жазбасын екі-үш сағаттан соң өшіріп тастады. Бірақ біз жазбаға байланысты барлық пікірдің скрин-көшірмесін алып қойдық. Пікірлердің көптігі сонша, бәріне тоқталып өту мүмкін емес. Десе де, сөзіміз дәлелді болуы үшін екі-үш пікірді ықшамдап ұсынғанды жөн көрдік.
Қазақстан Жазушылар одағы Шығыс Қазақстан облыстық филиалының директоры Әлібек Қаңтарбаев: «Жоғарыдағы шағын аудандағы үйлердің сапасыз екендігі жайлы, өзің де жазып отырсың, сан мәрте сөз болған екен. Жарайды, мердігер ұятсыздау болған екен дейік, оны қалалық қабылдау комиссиясы қалай ғана қабылдап алған? Бармақ басылмаған, көз қысылмаған деп қалай ғана кепілдік бересің? Ең бастысы, ол үйлердің қабырғалары биттің қабығындай, ішкілері сіркенің жаялығындай екендігін айтып шағымданған тұрғындардың жанайқайы баяғыда облыс шекарасынан шығып кеткен».
Қоғам белсендісі Ермек Құрманғали: Сол үйлердің бірінде мен өзім де тұрамын. Үйлердің сапасы шындығында да сын көтермейді. Әсіресе терезелерінен жел аңқылдап, жаңбырлы күні су кіреді. Ал ең соңғы қабатта тіпті қиын. 9-қабатты үйлердің сапасы тіпті нашар. Көрші үйдің жатын бөлмедегі дауысы келесі үйдің ас үйіне естіліп тұрады
Ұстаз Мейіржан Темірбек: «Мен сол жерден үй алдым. Өскеменді шулатып жүріп бітпей жатқан жерлерін зорға бітірттім. Сыртын қаптаймыз деген уәделері далада қалды. Стендерінен су өтеді. Өтіріктің шегі болу керек қой».
Сонымен қатар осы 19-шағын аудандағы олқылықтарға қатысты жасаған репортаждарымен журналистер де бөліскен. Мақала газетке шықпас бұрын, бұл проблемаларды әлеуметтік желілерде блогерлер де көтерген. Сондағы бейне материалдардың бірінде Өскемен қалалық құрылыс бөлімінің өндірістік техникалық сектор меңгерушісі Мадияр Әбілханов үйлердің қабырғасынан су кірмеуі үшін темір сайдингпен қапталатынын айтқан. Мәселенің барын да жасырмаған. Қабырғасынан жаңбыр өтіп тұрған жалғыз үй еместігін де тілге тиек еткен. Яғни газетіміз хатта жазылғандай «тырнақ астынан кір іздеп» отырған жоқ. Сапасыз үй тұрғындарының жанайқайын ғана жеткізді. Үйлердің қопсыған қабырғалары қарусыз көзбен-ақ көрініп тұр.
І.Есенберлин 2/2 мекенжайындағы үйдің кіреберісіндегі қопарылып жатқан кафельдері әлі ауыспаған. Ал «ВК Техногрупп» ЖШС жоба менеджері Дəурен Дюсупов газет редакциясына берген пікірінде қазанның соңына дейін кафельдерді алып, тротуар плиткасын төсейміз деген еді. Қазан бітіп, қараша басталды...
Әрине, 19-шағын ауданда Есенберлин даңғылынан Уәлиев көшесіне дейін созылып жатқан аллея салынды. Тротуар төселіп, балалар үшін ойын алаңдары орнатылды. Аллеяның кіреберісіне көрікті қаланың белгісі іспеттес арка қойылды. Шет жағына «Oskemen» деп латынша жазу жазылды. Аллея түнде де самаладай жарқырап тұр. Алайда сапасыз баспана бұйырған тұрғындар оған қуана ала ма? Олардың жан-айқайын кім тыңдап, мәселелерін кім шешуі тиіс? Мемлекет басшысының «халық үніне құлақ асатын мемлекет» тұжырымдамасы осындай сауалдарға жергілікті деңгейде құлақ асып, халықтың мұң-мұқтажын шешуден басталуы керек емес пе?
Шығыс Қазақстан облысы
