Нұр-Сұлтанда өткен бәсекеде "Барыстың" басымдығы еш күмән туғызған жоқ. Бірінші кезең шиеленісті өткенімен, қос команда біразға дейін бір-бірінің осал тұсын таба алмады. Тек кезеңнің аяқталуына санаулы секундтар қалғанда Линус Виделль есеп ашты. Бұл – 35 жастағы швециялық шабуылшының ҚХЛ-дағы 100-голы. Командалар үзілістен шыққан бетте айдын иелері екінші шайбаны қақпаға енгзіді. Бұл жолы Виктор Сведбергтің оңтайлы пасынан кейін Кертис Волк нысананы дәл көздеді. Ойынның 25 минутында Мэтт Фрэттин жергілікті жанкүйерлерді тағы бір қуантты. Осылайша, бұл кездесу 3:0 есебімен аяқталды.
Енді өзінің келесі үш кездесуін "Барыс" сыртта өткізеді. Атап айтсақ, 8 қарашада Череповецте "Северстальға" қарсы ойнаймыз. Ал 10 және 12 қараша күндері Ярославльдің "Локомотив" және Нижнекамскінің "Нефтехимигімен" күш сынасамыз.
