– Науқастардың біразы вирусты қайдан жұқтырғанын айта алмайды. Сондықтан көпшілік орындарда санитарлық талаптарды сақтау қажеттігін халыққа қайта-қайта ескерту қажет, – дейді облыс әкімі Ғали Есқалиев.
Облыста Сovid-19-ды ПТР-тестілеу арқылы анықтайтын 7 зертхана бар. Бір аптада осы зертханалардан 9 мыңға жуық адам өткен. Тестілеу құны Батыс Қазақстан облысы тауарлар мен көрсетілетін қызметтердің сапасы мен қауіпсіздігін бақылау департаментінің арнайы зертханасында 8 220 теңге тұрады, жекеменшік зертханаларда 9 мың теңгеден аспайды. ПТР-тест өтушілердің 70 пайызы жолдамамен, тегін өткізілген.
– Ресейдегі ахуалға байланысты шекарадағы бақылау күшейтілді. Біздің мамандар шекара бекетінде, төрт автоөткелде күні-түні жұмыс істеп жатыр. Соңғы бір аптада шекарадан 1 158 жаяу жүргінші өткен. Оның 1 044-інде ПТР-тестілеу анықтамасы болған. Ал анықтамасыз өткен 114 адам карантинге жатқызылып, оның үшеуінде ПТР-тестілеу нәтижесі оң нәтиже көрсетті. Ресей Федерациясының 19 азаматын құжаты болмауына байланысты шекарадан өткізбедік, – дейді облыстық бас санитарлық дәрігері.
Штаб отырысында белгілі болған бір мәселе – облыс аумағына шекарадан өткен транзиттік жүргізушілерге қатысты. Халықаралық келісімдерге сәйкес, транзиттік көліктер шекарадан кедергісіз өтеді. Соңғы бір аптаның ішінде 2 300-ге жуық транзиттік жүргізуші облыс арқылы өткен. Олардың арасында вирус тасымалдаушылары да болуы мүмкін.
Шекарадан өтетін жүргізушілердің көпшілігі ПТР-тестсіз, анықтамасыз келеді. Олардың ішінде 8 адамнан коронавирус анықталған.
– Біз 19 қазаннан бастап транзиттік көліктерді шекарадан күтіп алып, полицияның жетегімен алып жүреміз. Ақтөбе, Атырау, Тасқала, Самара жағынан күндіз төрт экипаж, түнде төрт экипаж осы қызметте жүр. Осы жерде бір мәселе туындайды: кейбір транзиттік көліктер қала ішіндегі кемпингтерге аялдап, тоқтап қалады. Оларды қашан қаладан шығып кеткенше бақылап жүру мүмкін емес. Сондықтан қала ішіндегі кемпингтердің транзиттік көліктерге қызмет көрсетуін шектейтін тәртіп керек. Облыстың бас санитар дәрігері осы мәселеге арнайы қаулы шығарса, – деген ұсынысын білдірді Батыс Қазақстан облыстық Полиция департаменті бастығының орынбасары Жанболат Жаншин.
Ал Ғ.Есқалиев кейбір тұрғындардан арыз түскенін, шекарадан өтіп жатқан транзиттік көліктердің ішінде көлікке, жүкке қатысы жоқ ресейлік азаматтар болуы мүмкін екенін алға тартты.
– Мұндай арыз болғанымен, әзірге дәлелденген жоқ. Ресейден келетін жүк көлігінде екінші жүргізуші болады. Олардың кейбірінде сол көлікті жүргізуге рұқсат беретін тиісті категория болмаған оқиға кездесті. Осыған қарап, шекарадан өтіп кету үшін олар жүргізушімен қандай да бір сомаға келісіп алуы мүмкін деген күмән туады. Бірақ мұны тексеру қиын, – деді шекара қызметінің өкілі.
Ғ.Есқалиев бұл мәселені республикалық деңгейде көтеруді тапсырды.
