Бүгінде облыста карантиндік шаралардың сақталуын бақылайтын мобилді 158 мониторинг тобы құрылған екен. Мұның 20-сы – облыс орталығында болса, 138-і аудандарда қызмет етеді. Осы топтар 2 қарашаға дейін карантин шектеу талаптарының 348 мәрте бұзылғанын анықтаған. Полиция департаменті қызметкерлері 2 534 заңбұзушылықты тіркеген. Тәртіп бұзғандардың 2 578-і жеке адамдар болса, 304 заңды тұлға да шектеу талаптарын бұзып, көзге түскен.
Өткен аптада батысқазақстандық ауыл әкімі ұлының үйлену тойын Орал қаласында мейрамханада тойлағаны туралы ақпарат жария болған еді. Штаб отырысында ауыл әкімінің мәселесі де қаралды.
– Ақжайық ауданы Ақжол ауылдық округінің әкімі Тәтжан Өтемісов 9 қазан мен 9 қараша аралығында кезекті еңбек демалысында болған. Лауазымдық мерзімі аяқталуына байланысты ол 10 қарашадан бастап қызметінен босатылады, – деді облыс әкімі аппаратының жетекшісі Берік Батаев.
Сондай-ақ Т.Өтемісовтің мәселесі «Мемлекеттік қызметшілерді тәртіптік жауапкершілікке тарту ережелері туралы» Президент Жарлығына сәйкес Мемлекеттік қызмет істері департаментінің арнайы кеңесінде қаралмақ.
Батыс Қазақстан облыстық тұтынушы құқығын қорғау басқармасы карантиндік шектеу шараларын бұзғаны үшін Тәтжан Өтемісовке 41 670 теңге әкімшілік айыппұл салғаны да белгілі болды.
Әрине, мұндай қатаң шаралардың бәрі де облыс тұрғындарының денсаулығы үшін жасалып жатыр. Егер вирус жаппай тарап, карантин тәртібі қатаңдайтын болса, халыққа да, өңір экономикасына да ауыр тиетіні сөзсіз. Батыс Қазақстан облыстық денсаулық сақтау басқармасы басшысының міндетін атқарушы Ғизатулла Лямовтың айтуынша, соңғы аптада облыста ковидтық пневмониямен ауыру көрсеткіші көбейген. Дәл қазір 148 науқас Сovid-19 дертінен ем алуда. Сондықтан сақтықты күшейтпесе болмайды.
