Таратып айтсақ, 2,9 млрд теңге қаржыға Орал қаласындағы №33 және №51 орта мектептердің құрылысы, Қазталов ауданы орталығы мен Сарықұдық ауылындағы мектеп ғимараттары, Бәйтерек ауданына қарасты Зеленое ауылындағы орта мектеп құрылысы салынбақ. Бөкей ордасы ауданының Бөрлі ауылындағы Мәдина Бегалиева атындағы орта мектебінде екі ғимарат арасында жабық өткелі, Жәнібек ауданында Алма Оразбаева атындағы орта мектептің спортзал құрылысы, Ақжайық ауданы орталығындағы орта мектеп те – осы жоспар ішінде.
Облыстық ауруханаға жапсарлас салынған қосымша мен тез тұрғызылатын жұқпалы аурулар ауруханасының құрылысына – 7,4 млрд теңге қарастырылған.
Сондай-ақ Теректі ауданы Жаңа өмір ауылында, Шынғырлау ауданының Тасмола ауылында, Жаңақала ауданы Жаңажол ауылында ауылдық мәдениет үйлері салынуда. Орал қаласы мен Тасқала ауданы орталығында әкімшілік нысан ғимараты салынып, Қаратөбе ауданы орталығында құрылыс жүріп жатыр.
Жоғарыда айтылған нысандардың ішінен бүгінгі таңда 5 әлеуметтік ғимараттың құрылысы аяқталған. Батыс Қазақстандағы Қарашығанақ газ конденсат кешенін игеруші шетелдік альянс жыл сайын облыс бюджетіне қомақты қаржы құйып, өңірдің әлеуметтік мәселелерін де шешуге атсалысып келеді.
2020 жылы Қарашығанақ Петролеум Оперейтинг б.в. компаниясының қаражаты есебінен Жаңақала ауданы орталығында дене шынықтыру-сауықтыру орталығының құрылысы аяқталды. Сонымен қатар қазіргі таңда дәл осындай 8 дене шынықтыру-сауықтыру орталығы мен балалар мен жасөспірімдердің спорт мектебінің бір ғимараты, Орал қаласында 1 көпбейінді мәдениет сарайының құрылысы жүріп жатыр. Орал халықаралық әуежай ғимаратының қайта құрылысы мен модернизациялауы да осы ҚПО есебінен жүргізілуде. Таяу болашақта Жәнібек, Ақжайық, Бөкей ордасы, Шыңғырлау, Қазталов, Тасқала ауданы орталықтарында, Теректінің Подстепное және Қазталовтың Жалпақтал ауылдарында да заманауи спорт кешендері пайдалануға берілмек.
