Осындай тақырыппен Өскеменде мемлекеттік тілдің қолдану аясын кеңейту, тіл мәртебесін, рухын асқақтату, халық арасындағы талапты да талантты жастарды іздеп табу, олардың шығармашылық бастамасына қолдау көрсету мақсатында Шығыс Қазақстан облысының тілдерді дамыту басқармасының қолдауымен жазба ақындардың мүшәйрасы болып өтті.
Осындай тақырыппен Өскеменде мемлекеттік тілдің қолдану аясын кеңейту, тіл мәртебесін, рухын асқақтату, халық арасындағы талапты да талантты жастарды іздеп табу, олардың шығармашылық бастамасына қолдау көрсету мақсатында Шығыс Қазақстан облысының тілдерді дамыту басқармасының қолдауымен жазба ақындардың мүшәйрасы болып өтті.
Мүшәйраға 30-дан астам үміткер қатысты. Бірінші кезеңде қазылар алқасының іріктеуінен өткен 12 ақын Достық үйінде өздерінің тіл туралы өлеңдерін оқыды. Мүшәйрада бірінші орынды жеңіп алған Бақжан Елсінбекқызының «Тілтұмар» деген өлеңі жиналғандарға көп ой салды. Тәуелсіздік алған 22 жылда тіл проблемасы шешілудің орнына құлдырып бара жатқандай ма қалай?
«Құндыз бөрік бойжеткенбіз,
құрбым-ау,
Күн қатпарлы ақ шымылдық
тұр мынау.
Анам тақты ақ желекке
Тілтұмар,
Тіліне ешкім салмасын
қылбұрау».
Сонымен, 12 ақынның өлеңдеріне қазылар алқасы төрелігін шығарды. Қазылар алқасының төрағасы ақын, бірнеше жыр жинақтарының авторы Серік Ғабдуллаұлы өлеңдердің мазмұны мен көркемдігі, ой жүйелігі мен тереңдігі, тақырыпты қамту, сөз қолданысы, ұйқасы мен өзектілігіне мән бергендерін айтты. Бас жүлдені Семей мемлекеттік педагогикалық университеті тіл әдебиеті факультетінің студенті Бауыржан Игілік жеңіп алды. Бақжан Елсінбекқызы бірінші, Қастербек Сайлауғазыұлы екінші, ал Қызырбек Дүргінбайұлы үшінші орындарды иеленді. Мүшәйраны жүргізген Зәуреш Төлеуханқызы жергілікті көркемөнерпаздардың өнерін көпшілік талқысына ұсынып, арасында тіл туралы өлеңдерді оқып, көпшілікті ұйытып тастады. «Туған тілім – сарқылмас қазынам» деген жыр мүшәйрасының тағылымды жақтары мол болды.
Оңдасын ЕЛУБАЙ,
«Егемен Қазақстан».
ӨСКЕМЕН.
